SALMOS 34 - Dios Rimashcata Quillcashcami

Mandac Dios cuidac cashcamanta

Cai Salmotaca Davidmi Abimelecpac ñaupapi loco shina cashcamanta llucchishpa cachacpi ruhuarca.

¹ Mandac Diostaca punzhanta alli nicushallami. Ñuca shimihuan cantashpaca manatac upallashachu.

² Mandac Dios-huanmi ñuca almaca cushicun. Mana utca piñaric shungucuna caita uyashpaca cushicungami.

³ Mandac Diostaca ñucahuan pacta alli nichicyari. Paipac shutitaca shuc shinalla tucushpa jatunyachishunchicyari.

⁴ Ñuca Mandac Diosta mashcacpica, paica uyarcami. Ñuca manchaihuan cacpica, paica quishpichircami.

⁵ Mandac Diosta chapaccunaca cushilla ñahuimi tucurca. Paicunaca mana pingaichishcachu carca.

⁶ Cai huaccha runa caparishpa mañacpica, Mandac Diosca uyashpami tucui llaquicunamanta llucchirca.

⁷ Mandac Diosta manchaccunataca paipac angelmi muyundita cuidashpa charicun.

⁸ Mandac Dios alli cactaca cancunallatac ricushpa yachaichicyari. ¡Paipi miticuc runaca maimi cushicun!

⁹ Mandac Diosta manchaccunaca ima illac mana causancunachu. Paipaclla causaccunaca paita manchaichicyari.

¹⁰ Leoncunaca micunata mana charishpaca llaquillami purincuna. Ashtahuanpish Mandac Diosta mashcaccunaca ima illac mana causangachu. Tucui allitami charingacuna.

¹¹ Huahuacunalla, shamushpa uyaichicyari. Mandac Diosta manchanatami yachachigrini.

¹² ¿Maijantac unaita causasha ninguichic? ¿Maijantac unai huatacunata allita ricushpa causasha ninguichic?

¹³ Chaita munashpaca cambac calluhuan mana allita rimanamanta cuidaringui. Cambac shimihuan llullanata jarcaringui.

¹⁴ Millaimanta anchurishpa allita ruhuangui. Pihuanpish sumacta causana yuyailla cangui.

¹⁵ Mandac Diosca cashcata ruhuaccunataca paipac ñahuihuanmi ricuracun. Paicuna caparishpa mañashcatapish uyaracunmi.

¹⁶ Mandac Diosca millaita ruhuaccunataca piñanmi. Paicunapac shuticunata pipish ama yuyarichunmi cai pachamanta chingachin.

¹⁷ Cashcata ruhuaccuna caparishpa Mandac Diosta mañacpica, paica uyashpa tucui llaquimanta llucchircami.

¹⁸ Mandac Diosca shungu nanarishcacunapac cuchullapimi. Llaquihuan caccunatapish quishpichingami.

¹⁹ Cashcata ruhuactaca achca llaquimi japin. Shina cacpipish, Mandac Diosmi tucui llaquimanta llucchinga.

²⁰ Paitaca shuc tullullapish paquirichunca mana saquingachu.

²¹ Millaita ruhuactaca chai millaillatacmi huañuchinga. Cashcata ruhuacta piñaccunaca llaquichishcami canga.

²² Ashtahuanpish paita serviccunapac almataca Mandac Diosmi quishpichinga. Tucui paipi shunguta churaccunaca mana llaquichishcachu canga.