SALMOS 33 - Dios Rimashcata Quillcashcami

Mandac Diosta pagui nishpa cantashcamanta

¹ Cashcata ruhuaccuna Mandac Diosmanta cushicuichicyari. Mana pandaric runacunamanca paita alabanaca mai sumacmi.

² Mandac Diostaca arpapi tocashpa pagui nichicyari. Chunga cuerdayuc tocanacunapi tocashpa cantaichicyari.

³ Mushuc cantohuan cantaichicyari. Cushicushpa sumac tonota tocaichicyari

⁴ Mandac Dios rimashca shimipica ima pandai mana tiyanchu. Pai ruhuashcacunami cashcata nic cashcataca ricuchin.

⁵ Mandac Diosca cashcata ruhuanata, allita ruhuanatami munan. Paipac cuyaica cai pachapica jundami.

⁶ Mandac Diosca rimashcallahuanmi jahua pachataca ruhuarca. Chaipi imalla tiyactapish, paipac samaihuanmi ruhuarca.

⁷ Paimi mama cucha yacucunataca montonashpa charin. Tucui jatun yacucunatami huacaichishpa churan.

⁸ Mandac Diostaca tucui cai pachapi causaccuna manchaichicyari. Tucui cai pachapi causaccuna paita manchashpa chucchuichicyari.

⁹ Pai rimacpimi tucui imapish ruhuarirca. Pai mandacpica maipi tiyarina pushtullapitacmi tucui imapish tiyarirca.

¹⁰ Mandac Diosca llactacunapi causaccuna cunashcataca yangapimi churan. Shinallatac gentecuna yuyarinacushcatapish chingachishpami churan.

¹¹ Ashtahuanpish Mandac Dios imata ruhuasha nishcaca huiñaipacmi can. Paipac shungupi imata yuyarishcataca huahua huahuacunami pactachicungalla.

¹² ¡Llactacunatapi causaccuna mai cushicuichicyari! ¡Cancunapac Diosca Mandac Diosmi!

¹³ Mandac Diosca jahua pachamantami huañuclla aichayuc tucui gentecunataca ricucun.

¹⁴ Pai causac huasimantaca tucui cai pachapi causaccunatami ricucun.

¹⁵ Paimi tucuipac shunguta ruhuarca. Chaimantami shungu imata yuyacushcatapish yachan.

¹⁶ Pi jatun mandacpish achca soldadocunallahuanca mana quishpiri pudinchu. Jatun sinchi runapish pai fuerzata charishcallamantaca mana quishpiri pudinchu.

¹⁷ Caballocunata charishcapish yangallami. Chai caballocuna manchana fuerzata charicpipish mana mishai pudinchu.

¹⁸ Ashtahuanpish Mandac Diospac ñahuica paita manchaccunata, pai llaquichun nishpa shuyacuccunatami ricucun.

¹⁹ Huañuimanta almata quishpichishpa, yarcai punzhacunapi micunata cushpa causaita cungapacmi chashnaca ricucun.

²⁰ Ñucanchic almaca Mandac Diostami shuyan. Paica ñucanchicta ayudac, ñucanchicta jarcac escudomi.

²¹ Chaimantami ñucanchic shunguca paimanta cushicun. Ñucanchicca paipac jucha illac shutipimi shunguta churashcanchic.

²² Mandac Dioslla, ñucanchic canta shuyacushca shinallatac ñucanchicta llaquinataca amatac saquinguichu.