SALMOS 32 - Dios Rimashcata Quillcashcami

Juchata Dios perdonacpi, cushicuna cashcamanta

Yachachingapac David ruhuashca Salmomi.

¹ Mana cazushcata perdonashca, tucui juchacunatapish cungarishca runaca mai cushicunmi.

² Mandac Dios mana juchanchishca runaca cushicunmi. Paipac shungupica llullana munaica mana tiyanchu.

³ Ñuca juchacunata Diosman mana huillashpa yallita llaquiricpica, punzhantami ñuca tullucunaca maucayashpa catirca.

⁴ Tutapish, punzhapish cambac maquica llaquichishpami catirca. Verdinlla quihua shina cashpapish, usyaipi chaquishca quihua shinami tucurca.

⁵ Ñuca juchacunata huillashpaca ima mapata ruhuashcatapish mana pacashpami huillarcani. Ñucaca: «Canta mana cazushcataca can Mandac Diosmanmi huillasha» nircani. Chashna huillacpimi, ñuca millaita ruhuashpa juchallishcataca perdonarcangui.

⁶ Chashna cacpimi, canta cazuccunaca can uyana punzhapi mañangacuna. Jatun yacu jundac shina shamushpapish paicunataca manatac japingachu.

⁷ Canmi ñuca jarcarina cangui. Llaquicunamanta cuidashpa, quishpirishcata huillac cantocunahuan, ñucata muyunguiyari.

⁸ Canmi: «Allita entendichishpa yachachishpa can purina ñanta ricuchisha. Ñuca ñahuihuanmi cantaca ricurasha.

⁹ Ama caballo shina, mana cashpaca mula shina yuyai illac caichu. Chaicunataca anguhuan huatashpa, frenota shimipi churashpami cazuchincuna. Mana chashna ruhuashpaca mana cuchuyai pudinguichu» nircangui.

¹⁰ Diosta mana manchactaca jatun nanaicunami japinga. Ashtahuanpish Mandac Diosta shuyactaca paipac cuyaihuanmi pilluchic shina huacaichinga.

¹¹ Cashcata ruhuaccunalla, Mandac Diosmanta cushicuichicyari. Shungupi ima millai yuyaita mana chariccuna cushicushpa cantaichicyari.