SALMOS 31 - Dios Rimashcata Quillcashcami

Mandac Diosllapimi shunguta churana cashcamanta

Cantaccunata pushac cantachichun, David ruhuashca Salmomi.

¹ Mandac Dioslla, canllapimi shunguta churani. Ñuca pingaichishca cachunca amatac saquinguichu. Canca cashcata ruhuacmi cangui. Chaimanta ñucata quishpichiyari.

² Cambac ringrihuan uyashpa, llaquimantaca utca llucchiyari. Ñuca jarcarina jatun rumi caiyari. Muyundi jatun pirca shina quishpichiyari.

³ Canca ñuca jarcarina jatun rumipish, muyundi jatun pircapish canguimi. Can jatun cashcata yachachunca alli ñanta cuidashpa pushaiyari.

⁴ Canca ñuca jarcarina jatun pirca shinami cangui. Chaimanta ñucata urmachingapac pacalla churashca tucllamanta llucchiyari.

⁵ Cambac maquipimi ñuca espirituta mingani. Cashcata nic, ñucata Mandac Dioslla, canmi quishpichircangui.

⁶ Yanga dioscunapi shunguta churaccunataca piñanimi. Ñucaca Mandac Dios canpimi shunguta churani.

⁷ Canca ñuca llaquihuan cacta ricushpa, cuyashcamantaca yallitami cushicuni. Ñuca alma llaquilla cactapish ricushcanguimi.

⁸ Piñacpac maquipica mana churarcanguichu. Ashtahuanpish ñuca chaquicunataca pi mana llaquichina pushtupimi churarcangui.

⁹ Mandac Dioslla, llaquihuanmi cani, ñucata llaquiyari. Chashna llaquihuanmi ñuca ñahuicunapish, ñuca almapish, cuerpopish irquiyashca.

¹⁰ Ñuca causaica nanaihuanmi tucuricun. Shungupi llaquiricushpami huatacunatapish tucuchicuni. Ñuca juchacunamantami irquiyashpa tullucaman tucuricuni.

¹¹ Piñaccunaca burlashpami asincuna. Ñuca vecinocunapacpish, ñuca ricsishcacunapacpish mancharinami tucushcani. Maipi ñucata ricushpaca mancharishpami callpancuna.

¹² Paicunapac shungupica huañushca shinami cungarishca cani. Paquirishca vaso shinami cani.

¹³ Huashalla parlanacushcatami taucata uyani. Maipipish manchaihuanmi purini. Ñuca causaita tucuchingapacmi pacalla tandanacushpa parlanacuncuna.

¹⁴ Shina cacpipish, Mandac Dioslla, canpi shunguta churashpami: «Canmi ñuca Dios cangui» nircani.

¹⁵ Ñuca causaipish cambac maquipimi. Piñashpa llaquichiccunamanta quishpichiyari.

¹⁶ Cushilla ñahuihuan canta servicta ricuiyari. Can cuyac cashcamantaca quishpichiyari.

¹⁷ Mandac Dioslla, cantaca mañacunimi. Pingaichishca cachunca amatac saquinguichu. Canta mana manchaccunaca pingaichishca cachun. Seolpi upalla cachuncuna.

¹⁸ Cashcata ruhuac runataca jatun tucushpami, piñashpa maipish cachun camincuna. Chai llullaccunaca upayashca saquirichun.

¹⁹ ¡Canta manchaccunapacca mai allimi cangui! Paicunataca yallitami cuyangui. Huañunalla gentecunapac ñaupapimi chai cuyaitaca canta shuyaccunaman ricuchishcangui.

²⁰ Gentecuna yuyarinacushpa llaquichinamantaca cambac ñaupapi churashpami huacangui. Camishpa llaquichinamantaca cambaclla canhuan tupana huasipimi huacaichingui.

²¹ ¡Mandac Diosca alli nishca cachun! Paica muyundita jatun pircashca pueblopica ñucata llaquishpami jatun mancharinata ruhuarca.

²² Ñucaca manchaihuan upayashpami: «Cambac ñaupamantaca anchuchishca cani» nishpami yuyarcani. Ashtahuanpish caparishpa mañacpica, uyarcanguimi.

²³ Mandac Diospaclla caccuna paita cuyaichic. Mandac Diosca paita cazuccunataca cuidanmi. Ashtahuanpish jatun tucushcacunataca yallihuanmi llaquichinga.

²⁴ Mandac Diosta shuyaccunaca ashtahuan sinchiyaichiclla. Cancunapac shungupica samaita aisac shina sinchiyaichiclla.