SALMOS 30 - Dios Rimashcata Quillcashcami

Mandac Diosta pagui nishcamanta

Diospac huasita mingana punzhapi cantangapac David ruhuashca Salmomi.

¹ Mandac Dioslla, ñucata cacharichishcamantami alli nishpa cantani. Ñucata piñaccuna cushicuchunpish mana saquircanguichu.

² Mandac Dioslla, ñuca caparishpa canta mañacpica, huañugricucpipish alliyachircanguimi.

³ Mandac Dioslla, ñuca almataca Seolmantami llucchircangui. Enterrana jutcuman ama richunmi causaita curcangui.

⁴ Mandac Diospaclla causaccuna paita cantaichic. Pai jucha illac cashcata yuyarishpa cushicuichic.

⁵ Paica ashacamanllami piñarin. Ashtahuanpish huiñaitami paica cuyan. Tutaca huacaimi tiyan, tutamantaca cushicuimi shamun.

⁶ Ñuca sumacta causacushpaca: «Pipish mana cuyuchingachu» nircanimi.

⁷ Mandac Dioslla, canca cuyashpallami pipish mana cuyuchipac jatun urcuta shina ruhuarcangui. Cambac ñahuita pacacpica musparircanimi.

⁸ Mandac Dioslla, cantami caparishpa mañasha. Jatun Diosta cutinpish cutinpish mañashpaca:

⁹ «Ñuca huañushpa, enterrana jutcuman ricpica, ¿imatatac japingui? ¿Allpaca canta alabangachu? ¿Can cashcata nic cashcata huillangachu?

¹⁰ Mandac Dioslla, ñucata llaquishpa mañashcata uyaiyari. Mandac Dioslla, ñucata ayudaiyari» nishami.

¹¹ Ñuca llaquitaca cushicushpa danzanatami ruhuashcangui. Llaquipi sharpa churanata llucchichishpami, cushipi churarinata churachishcangui.

¹² Ñuca Dioslla, chaimantami mana upallashpa cantacushalla. Ñucata Mandac Dioslla, huiñaitami alabacushalla.