SALMOS 3 - Dios Rimashcata Quillcashcami

Tutamanta Diosta mañanamanta

David paipac churi Absalonmanta miticushpa ricushpami cai Salmota ruhuarca.

¹ ¡Mandac Dioslla, ñucata piñaccunaca yallitami mirarishca! Taucacunami ñucata llaquichingapac shayarincuna.

² Taucacunami ñucataca: «¡Diosca paitaca mana quishpichingachu!» nincuna.

³ Ashtahuanpish Mandac Dioslla, escudo shinami ñuca muyundita jarcangui. Canca sumaimana cushichicmi cangui. Ñuca umata alzachishpa sinchiyachicmi cangui.

⁴ Ñucaca caparishpami Mandac Diosta mañarcani. Chaitaca paipaclla urcumantami uyarca.

⁵ Ñucaca sirirircanimi, sueñurcanimi. Mandac Dios ñucata cuidacucpimi, cayandi riccharircani.

⁶ Ñucata piñaccuna ñuca muyundita huaranga huaranga shayaricpipish mana manchanichu.

⁷ ¡Mandac Dioslla, jatariyari! ¡Ñuca Dioslla, quishpichiyari! Canmi ñucata piñaccunataca jazapi huactarcangui. Canmi millaita ruhuaccunapac quiruta paquircangui.

⁸ Can Mandac Diosmi quishpichic cangui. ¡Can acllashcacunata bendiciaiyari!