SALMOS 29 - Dios Rimashcata Quillcashcami

Mandac Dios rimashca jatun yacu jahuapi uyarishcamanta

David ruhuashca Salmomi.

¹ Jahua pachapi causac sinchicuna Mandac Diosman cuna cashcata cuichicyari. Mandac Diostaca imatapish ruhuaclla, sumaimanami cangui nichicyari.

² Mandac Diospac sumaimana shutitaca paita alabana cashca shinallatac alli alabaichicyari. Mandac Diostaca sumaimana jucha illac cashcamanta adoraichicyari.

³ ¡Mandac Dios rimashcaca yacu jahuapimi uyarin! ¡Sumaimana Mandac Dios rimashcaca manchana yacu jahuapimari tulun nishpa uyaricun!

⁴ Mandac Dios rimashcaca imatapish ruhuai tucunmi. Mandac Dios rimashcaca sumaimanamari.

⁵ Mandac Dios rimashcaca cedro yuracunatapish paquicmi. Líbano urcupi tiyac cedro yuracunatapish polvonmi.

⁶ Pai rimashpaca becita shinami Líbano urcutaca saltachirca. Sirión urcutaca, sacha becita shinami saltachirca.

⁷ Mandac Dios rimashcaca nina culun nicuc shinami llucshin.

⁸ Mandac Dios rimashcaca shitashca pambacunatami cuyuchin. Shitashca pamba Cadestapish cuyuchinmi.

⁹ Mandac Dios rimashcaca encina yuracunatapish paquinmi. Sachacunatapish cuyuchishpami chushac caspillata saquin. Paipac huasipica tucuimi pai sumaimana cashcata huillacun.

¹⁰ Mandac Diosca yacu juizhu jahuapimi tiyarirca. Huiñaitami jatun mandaccunapac tiyarinapi tiyacun.

¹¹ Mandac Diosca, pai acllashcacunamanca fuerzata cungami. Paicunamanca sumac causaita cushpami bendicianga.