SALMOS 28 - Dios Rimashcata Quillcashcami

Ayudachun nishpa mañashcata Mandac Dios uyashcamanta

David ruhuashca Salmomi.

¹ Mandac Dioslla, cantami caparishpa mañasha. Canca ñuca jarcarina jatun rumimi cangui. Ama ringrita pacaichu. Can ringrita pacashpa ñuca mañashcata mana uyacpica, huañushcacuna shinami casha.

² Caparishpa ñuca mañashcatapish, cambaclla huasi ladoman huichailla maquicunata chutashpa mañashcatapish uyaiyari.

³ Ama chai millai runacunahuan pacta huañuchichu. Paicunaca shuccunahuan sumacta rimashpapish shungupica millaitami yuyancuna.

⁴ Paicuna ruhuashca shinallatac llaquichiyari. Paicuna millaita ruhuashcamantaca chashnallatac llaquichiyari. Paicunapac maquihuan imata ruhuashca shinallatac llaquichiyari.

⁵ Mandac Dios, paipac maquihuan ruhuashcatapish mana yuyarincunachu. Chaimantami paicunataca ama cutin jatarichun tucui chingachinga.

⁶ Mandac Diosca alli nishca cachun. Paica ñuca mañashcata uyarcami.

⁷ Mandac Diosca ñucapac sinchi fuerza, ñuca jarcarina escudo shinami. Paitami ñuca shungupica shuyani. Chashna pai ayudashcamantami ñuca shungupi yallita cushicushpa, ñuca ruhuashca cantohuan paita cantacusha.

⁸ Mandac Diosca pai acllashcacunapac sinchi pirca shinami. Pai aceitehuan cahuishpa acllashca runapacca quishpichic shinallatac jarcarinami can.

⁹ Mandac Dioslla, can acllashcacunata quishpichiyari. Cambaclla gentecunataca bendiciaiyari. Paicunataca huiñaita michishpa, cuidashpa pushaiyari.