SALMOS 27 - Dios Rimashcata Quillcashcami

Mandac Diosta mashcaccuna imata shuyana cashcamanta

David ruhuashca Salmomi.

¹ Mandac Diosca ñucata achicyachic luzmi. Shinallatac ñucata quishpichicmi. Chaimantaca ¿pitatac manchashayari? Mandac Diosca ñuca causaipacca jarcarina jatun pirca shinami. Chaimantaca ¿pitatac manchashayari?

² Millaita ruhuaccunapish, ñucata llaquichiccunapish, ñucata piñaccunapish, ñucata tucuchingapac, tandanacushpapish paicunaracmi mitcarishpa urmarca.

³ Achca soldadocuna ñucata muyunacushpa shamucpipish, ñuca shunguca mana manchangachu. Ñucata huañuchingapac jatun macanacuita ruhuacpipish Paipimi shunguta churasha.

⁴ Ñucaca pai sumac cashcata ricushpa, alli alli yachangapacmi tucui causaipi paipac huasipi charichun Mandac Diostaca mañani. Chaillatami mañani.

⁵ Llaqui punzhacunapica paihuan tupana huasipimi huacaichinga. Paipaclla chicanyachishca ucupimi pacanga. Jatun torre jahuapimi churanga.

⁶ Chashna ruhuashpami ñuca muyundipi cac, ñucata piñaccunapac jahuapi churanga. Chaimantami cushicushpa, paihuan tupana huasipica animalcunata cushpa huañuchisha. Mandac Diostaca sumac salmocunahuanmi cantashpa alli nisha.

⁷ Mandac Dioslla, ñuca caparishpa canta mañashcataca uyaiyari. Ñucata llaquishpa ñuca mañashcata uyaiyari.

⁸ Ñuca shunguca: «Paipac ñahuita mashcai» ninmi. ¡Chaimantami Mandac Dioslla, canta mashcani!

⁹ Cambac ñahuita ama pacaichu. Canta servic ñucahuanca ama piñarichu. Cambac ñahuitaca ñucamanta amatac anchuchichu. Ama ñucata shitashpa saquichu. Canllami ñucata quishpichic Dios cangui.

¹⁰ Ñuca taita, ñuca mama saquicpipish, Mandac Diosmi ñucataca tandanga.

¹¹ Piñaccunaca ñucata juchanchicunmi. Chaimanta Mandac Dioslla, alli ñanta pushashpa canhuan ima shina causanata yachachiyari.

¹² Millaita yuyaccunaca llullashpa, yanga juchanchingapacmi jatarishcacuna. Chaimanta ñucata piñaccuna paicuna munashcata ruhuachunca ama paicunapac maquipi churaichu.

¹³ ¡Gentecuna causana cai pachapi Mandac Diospac cuyaita mana crishpaca, musparishpa huañuimanmi carcani!

¹⁴ Mandac Diosta shuyailla. Sinchiyashpa cambac shungupi cushicui. ¡Ari, Mandac Diosta shuyailla!