SALMOS 26 - Dios Rimashcata Quillcashcami

Ima pandata mana ruhuashcanichu nishpa David Diosman huillashcamanta

David ruhuashca Salmomi.

¹ Mandac Dioslla, ñucata cashcata ruhuailla. Ñucaca ima pandata mana ruhuashpa causashcanichu. Chashnallatac can Mandac Diospimi shunguta churarcani. Canmantaca mana anchurishachu.

² Mandac Dioslla, ñuca ima shina cacta allita ricuilla. Ñuca yuyaitapish, ñuca shungutapish chuyata ruhuailla.

³ Can llaquishcataca ñuca yuyaipimi charini. Cambac mana llullashca shimi nishca shinami causani.

⁴ Ñucaca llullaccunahuanpish mishqui shimi jayac shungu runacunahuanpish mana tandarircanichu.

⁵ Millaita ruhuaccuna tandanacuitaca mana ricunayanchu. Canta mana manchaccunahuanca jaicapi mana tandarircanichu.

⁶ Mandac Dioslla, ñuca ima millaita mana ruhuashcamantami, maquita jahuarishpa cambac altar muyundiman risha.

⁷ Chashna rishpami canta pagui nishpa cantasha. Cambac sumac ruhuashcacunatami huillasha.

⁸ Mandac Dioslla, cambac sumaimana causana huasitaca cuyanimi.

⁹ Ñucataca ama juchayuccunahuan tandachishpa huañuchichu. Huañuchic runata shinaca ama causaita quichuichu.

¹⁰ Paicunapac maquicunahuanca millaillatami ruhuancuna. Alli maquihuanca pacalla cushca cullquitami yallita japincuna.

¹¹ Ashtahuanpish ñucaca allillatami ruhuashpa purisha. Ñucataca llaquishpa quishpichiyari.

¹² Ñuca chaquihuanca alli ñanpimi shayacuni. Mandac Dioslla, cantaca tucui tandanacushcapac chaupipimi alli nisha.