SALMOS 25 - Dios Rimashcata Quillcashcami

Juchacunata perdonachun Diosta mañanamanta

David ruhuashca Salmomi.

¹ Mandac Dioslla, tucui almahuanmi mañacuni.

² ¡Ñuca Dioslla, canpimi shunguta churani! Ama pingaichichun saquinguichu. Ñucata piñaccuna cushicuchunca ama saquinguichu.

³ Maijanpish canpi shunguta churaccunaca mana pingaichishcachu canga. Llullashpa cambac contra jatariccunami pingaichishca canga.

⁴ Mandac Dioslla, cambac ñanta ricuchiyari. Can munashca shina causanata yachachiyari.

⁵ Ñucata quishpichic Dioslla, cantami punzhanta shuyani. Cashcata ruhuanata yachachic ñanpi churashpa yachachiyari.

⁶ Mandac Dios ñucata yuyariyari, canca huiñaita llaquic Diosmari cangui.

⁷ Huambrarac cashpa juchata ruhuashcacunatapish, canta cariyashcatapish ama yuyarichu. Mandac Dioslla, can llaquic cuyac, cuyac cashcamanta ñucata yuyariyari.

⁸ Mandac Diosca cashcata ruhuac alli shungu cashpami, juchayuccunataca alli ñanta catichun yachachin.

⁹ Yangalla runacunataca cashcata ruhuashpami pushan. Alli shungucunataca alli causanatami yachachin.

¹⁰ Pai ari nishcata, pai mandashcacunata cazuccunamanca cuyashpa, llaquishpami ima allitapish ruhuan.

¹¹ Mandac Dioslla, ñucaca jatun juchatami ruhuashcani. Cambac shuti alli nishca cachunca perdonaiyari.

¹² Mandac Diosca paita manchaccunamanca maijan ñanta acllachunmi yachachin.

¹³ Chai runaca alli causashpami cushicunga. Paipac huahuacunapish sumac allpapimi causanga.

¹⁴ Mandac Diosca paita manchaccunahuanca allimi apanacun. Shinallatac paihuan ari nishcatapish yachachinmi.

¹⁵ Mandac Diosmi ñucataca tucllapi urmanamanta huacaichin. Chaimantami ñuca ñahuihuan chaparacuni.

¹⁶ Ñucaca shitashca llaquillami cani. Mandac Dioslla, ñucata ricushpa llaquiyari.

¹⁷ Ñuca shungupica llaquicunaca yallitami mirashca. Chai llaquimanta llucchiyari.

¹⁸ Ñuca mai llaquita apashpa causacushcataca ricuiyari. Ñuca juchacunata tucui perdonailla.

¹⁹ Ñucata piñaccuna achca mirarishcata ricuiyari. Paicunaca ñucata yalli piñashpami mana ricunayachincuna.

²⁰ Canpimi shunguta churani, chaimanta cuidashpa quishpichiyari. Paicuna pingaichichunca ama saquinguichu.

²¹ Canllatami shuyacuni. Chaimantami ima pandata mana ruhuani. Allita ruhuana yuyai ñucata huacaichichun.

²² Ñuca Dioslla, israelcunata tucui llaquicunamanta llucchiyari.