SALMOS 24 - Dios Rimashcata Quillcashcami

Mandac Diosca sumaimana achiclla Jatun Mandac cashcamanta

David ruhuashca Salmomi.

¹ Cai pachapish, chaipi ima tiyaccunapish tucui cai pachapi causaccunapish Mandac Diospacmi.

² Paimi cai pachataca mama cucha jahuapi churashpa chai jahuapi sinchita tiyachirca.

³ ¿Pitac Mandac Diospaclla urcumanca huichicungayari? Paipaclla pushtupica, ¿pitac causangayari?

⁴ Chuya maquicuna shungupi ima mapa illaccuna, ruhuashcalla dioscunata mana adoraccuna, ari nishcata pactachiccunami chaimanca yaicunga.

⁵ Chashna alli runatami Mandac Diosca bendicianga. Quishpichic Diosmi paimanca cashcata ruhuanga.

⁶ Jacobopac Dioslla, cambac ñahuita ricusha nishpa, mashcaccunaca chashnami cana canchic.

⁷ ¡Pungucuna pascarichicyari! Huiñaita tiyac pungucuna, achic nicuc Jatun Mandac yaicuchun caiman chaiman anchurichic.

⁸ ¿Pitac achic nicuc Jatun Mandacca? ¡Paica tucuita ruhuac yallita sinchi Mandac Diosmi! ¡Paica macanacuita mishac Mandac Diosmi!

⁹ ¡Pungucuna pascarichicyari! Huiñaita tiyac pungucuna, achic nicuc Jatun Mandac yaicuchun caiman chaiman pascarichic.

¹⁰ ¿Pitac achic nicuc Jatun Mandacca? ¡Paica tucuita ruhuac Mandac Diosmi! ¡Paica achic nicuc Mandac Diosmi!