SALMOS 22 - Dios Rimashcata Quillcashcami

Llaquihuan cashpa Diosta mañashcamanta

Cantaccunata pushac tutamanta puric venadata cantana tonohuan cantachichun, David ruhuashca Salmomi.

¹ ¡Ñuca Dioslla, ñuca Dioslla! ¿Ima nishpatac ñucallata saquinguiyari? ¿Ima nishpatac ñucamantaca caruyanguiyari? Quishpichiyari nishpa, ñuca caparishcataca, ¿ima nishpatac mana uyanguiyari?

² Ñuca Dioslla, punzhacuna mañacpica mana uyanguica. Tutacuna mañacpipish mana samachinguica.

³ Canca jucha illacmi cangui. ¡Israelcuna alli nishcami causangui!

⁴ Ñucanchic ñaupa taitacunaca can quishpichichunmi shuyarcacuna. Chashna shuyacpica canca quishpichircanguimi.

⁵ Canta mañashpami llaquimanta llucshircacuna. Canpi shunguta churashpaca mana pingai tucurcacunachu.

⁶ Ashtahuanpish ñucaca curu shinallami cani. Mana runa shinachu cani. Runacuna burlashca, gentecunapac millashcami cani.

⁷ Tucui ñucata ricuccunami burlancuna. Paicunaca shimita huishtuyachishpa, umata cuyuchishpaca:

⁸ «Chaicunaca Mandac Diospimi shunguta churac carca. Pai cuyashcami cani niccunami carca. Shina cacpica Mandac Diosllatac quishpichichun. Paillatac llaquimanta llucchichun» nincunami.

⁹ Ashtahuanpish canmi mamapac huicsamanta llucchircangui. Canmi ñucataca chuchucucmanta pacha canpi shunguta churanata yachachircangui.

¹⁰ Manarac sajuarishpa ñuca mamapac huicsapi cashparacmi cambac maquipi mingashca carcani. Canca ñuca Diosmi cangui.

¹¹ Jatun llaqui japigrinmi, pi ayudacca mana tiyanchu. Ñuca ladomantaca ama caruyaichu.

¹² Ñucataca achca piña huagra shinami muyucuncuna. Basán llacta piñac huagracunapac chaupipi shinami cani.

¹³ León piñarishpa shimita pascac shinami ñucata piñashpa rimancuna.

¹⁴ Ñucaca talliricuc yacu shinami tucuricuni. Ñuca tullucunapish tucui quihuirishcami. Ñuca shunguca huira nuyucuc shinami tucuricun.

¹⁵ Ñuca shimipish chaquishca callana shinami. Ñuca callupish chaquishpami, palancarapi llutarin. Huañushpa allpa tucuchunmi saquishcangui.

¹⁶ Allcucuna shinami muyunacushpa charicuncuna. Millai gentecunami ñuca muyundipi shayacuncuna. Ñuca maquicunatapish, chaquicunatapish llaquinayaitami chugrichincuna.

¹⁷ Ñuca tucui tullucunapish yupanallami. Chashna ruhuashpaca paicunaca chaparacuncunami.

¹⁸ Ñuca churanatapish suerteta ruhuashpami, paicunapura chaupinacurca.

¹⁹ Shina cacpipish, Mandac Dioslla, ama ñucamanta caruyaichu. Canca ñuca muyunditaca jatun pirca shinami cuidangui. Utca quishpichingapac shamuiyari.

²⁰ Espadahuan huañuchinamanta quishpichiyari. Ñucapac causaitaca chai allcucunapac quirumanta quishpichiyari.

²¹ Leonpac shimimantapish, piña huagracunapac gachumantapish quishpichiyari.

²² Can ruhuashcataca ñuca huauquicunamanpish huillashami. Paicunapac chaupipimi canta alabasha.

²³ Tucui Mandac Diosta manchaccuna alabaichicyari. Tucui taita Jacobopac huahuacuna paitaca alli nichicyari. Taita Israelpac huahuacuna tucui mashna paita cazuichicyari.

²⁴ Paica ñuca llaquihuan cacpipish, mana cungarircachu. Llaquihuan cashpa ñuca mañacpica, ñahuita mana pacarcachu, ashtahuanpish ayudarcami.

²⁵ Can acllashcacuna tandanacushcapac chaupipimi cantaca alli nisha. Canman imata ari nishcataca canta manchaccunapac ñaupapimi pactachisha.

²⁶ Chaipica huacchacunaca mana nictami micungacuna. Mandac Diosta mashcaccunaca paitami alli ningacuna. ¡Paicunaca unaitami causangacuna!

²⁷ Cai pacha tucuri llactacunapi causaccunami Mandac Diosta yuyarishpa paiman cutingacuna. Tucui llactapi causaccunami cambac ñaupapi alli nishpa cumuringacuna.

²⁸ Mandac Diosmi tucuita jatun mandac. Paimi tucui llactacunata mandacun.

²⁹ Cai allpa pachapi causac tucui chayuccunaca cambac ñaupapimi cumuringacuna. Huañushpa allpa tucunalla gentecunapish, quiquinllatac mana causaita chari pudiccunapish tucuimi cambac ñaupapi cumuringa.

³⁰ Quipa huahua huahuacunapish Mandac Diostami servingacuna. Mandac Dios ruhuashcataca quipa huahuacunamanpish huillangacunami.

³¹ Pai cashcata ruhuashcata ashtahuan quipaman manarac huacharishcacunaman huillashpaca: «Paimi tucui allicunata ruhuarca» nishpami huillangacuna.