SALMOS 21 - Dios Rimashcata Quillcashcami

Macanacuipi mishashpa cantashcamanta

Cantaccunata pushac cantachichun, David ruhuashca Salmomi.

¹ ¡Mandac Dioslla, jatun mandacca can fuerzata cushcamantami cushicun! ¡Macanacuita mishachishcamantami yallita cushicun!

² Paipac shungu munashcatapish, paipac shimihuan mañashcatapish cushcanguimi.

³ Sumac allicunahuanmi tuparcangui. Umapica sumac curi coronatami churachircangui.

⁴ Causaita mañacpipish curcanguimi. Unaita causachunmi achca huatacunata curcangui.

⁵ Can mishachishpami paitaca jatunyachircangui. Tucuipac alli nishca cachunmi ruhuarcanguimi.

⁶ Huiñaipacmi bendicionta curcangui. Canca paihuan cashpami yallita cushichingui.

⁷ Chaimantami jatun mandacca Mandac Diospi shunguta churan. Jahua pacha Dios llaquishcamantami mana cuyuchishca canga.

⁸ Cambac maquihuanmi tucui canta piñaccunataca llaquichingui. Cambac maquihuanmi canta mana ricunayachiccunataca tucuchingui.

⁹ Can piñarishpaca nina japiricuc hornopi churac shinami paicunataca llaquichingui. Mandac Dios piñarishpami paicunataca nina rupachic shina tucui tucuchinga.

¹⁰ Paipac huahuacunatapish huañuclla runacunapurapica cai pachamanta chingachinguimi.

¹¹ Canta llaquichingapac cambac contra jatarishpapish, urmachingapac yuyarishpapish mana imata ruhuai pudingachu.

¹² Ashtahuanpish cambac arcohuan flechata ñahuipi shitashpami, paicunataca callpachingui.

¹³ ¡Mandac Dioslla, imatapish ruhuac cashcahuan can jatun cashcataca ricuchiyari! ¡Mishachishcamantaca cantashami, alabashami!