SALMOS 20 - Dios Rimashcata Quillcashcami

Mishashpa Diosta mañanamanta

Cantaccunata pushac cantachichun David ruhuashca Salmomi.

¹ Llaqui punzhacunapi mañacpi, Dios uyachun. Jacobopac Diosca canta misachun.

² Paipaclla cac Sión huasimanta fuerzata cushpa ayudashca cachun.

³ Can ofrendacunatapish yuyarichun. Can cushpa tucui rupachishcatapish chasquichun.

⁴ Can munashcacunata cushpa, cambac shungupi yuyarishcacunata pactachichun.

⁵ Can quishpichishcamantami ñucanchicca cushicushun. Can mishachishcamantami cambac shutipi banderata alzashpa yallita cushicuchun. Mandac Dios can tucui munashca pactachun.

⁶ Mandac Diosca aceitehuan cahuishca paipac jatun mandacta quishpichic cactaca cunanmi yachani. Jucha illac jahua pacha cambac huasimantami, pai mañashcataca uyashpa, paipac alli maquihuan mishachishca.

⁷ Shuctac gentecunaca carretacunapi, caishuccunaca caballocunapimi shunguta churancuna. Ashtahuanpish ñucanchicca, ñucanchicta Mandac Diospimi shunguta churanchic.

⁸ Paicunaca mishacpimi irquiyashpa urmancuna. Ashtahuanpish ñucanchicca sinchitami shayacunchic.

⁹ ¡Mandac Dioslla quishpichiyari! ¡Jatun mandaclla, ñucanchic mañashcata uyaiyari!