SALMOS 2 - Dios Rimashcata Quillcashcami

Mandac Dios acllashca jatun mandac mandanamanta

¹ ¿Imamantatac llactapi causaccunaca caparicuncuna? ¿Imamantatac gentecunaca manapish canata yuyarincuna?

² Cai pacha jatun mandaccunapish, quipa mandaccunapish tandanacushpami Mandac Diostapish, aceitehuan cahuishca jatun mandactapish, mana cazushpa piñancuna.

³ Chashna piñarishpami: «¡Pai huatashcamanta cacharirishunchic, pai huatashpa charicushcamanta llucshishunchic!» nishpami caparincuna.

⁴ Jahua pachapi causac Mandac Diosca asingami, paicunataca burlatami ruhuanga.

⁵ Chai quipaca nina japiric shina piñarishpa manchachishpaca:

⁶ «¡Ñucaca jatun mandactaca ñami ñucapaclla chicanyachishpa Sión urcupi mandachun churani!» nirca.

⁷ Mandac Dios cushca mandashcataca huillashami. Pai ñucata rimashpaca: «Canca ñuca churimi cangui. Cunanmi canmanca causaita cuni.

⁸ Llactacunatapish cambac cachun mañailla, ñucaca cushallami. Cai pacha tucuricamanmi cambaclla canga.

⁹ Paicunataca fierro varahuan mandashpami llaquichingui. Allpa mangata shinami ñutuchingui» nirca.

¹⁰ Jatun mandaccunalla, cunanca allita yuyarishpa causaichic. Llactacunata mandaccunapish ñuca cunashcata chasquichicyari.

¹¹ Mandac Diostaca manchaihuan servichicyari. Chucchushpa cushicuichicyari.

¹² Paipac churita alli nichic, pacta piñarinman. Paica nina japiric shinami piñaringa. ¡Paipi shunguta churaccunaca cushicuichicyari!