SALMOS 19 - Dios Rimashcata Quillcashcami

Dios tucuita ruhuashcamantapish, pai rimashcamantapish

Cantaccunata pushac cantachichun David ruhuashca Salmomi.

¹ Jahua pachaca Dios sumaimana cashcatami huillan. Chaipi tiyashcacunaca paipac maquihuan ruhuashcatami ricuchin.

² Shuc punzhaca caishuc punzhamanmi huillan. Shuc tutaca caishuc tutatami yachachin.

³ Ima rimashca shimicunapish, pi rimashcapish mana uyarinchu.

⁴ Shina cacpipish, pai huillashcaca tucui cai pachapi uyarishpami, cai pacha tucuricaman chayashca. Chaipimi intimanpish huasita churarca.

⁵ Intica cunanlla cazarashca sueñuna ucumanta llucshic shinami llucshicun. Shina llucshishpaca callpai callaricuc runa shinami cushicun.

⁶ Paica jahua pacha shuc ladomantami llucshin. Shina llucshishpaca caishuc lado jahua pachatami tigran. ¡Paipac rupachicmantaca imapish mana miticui pudinchu!

⁷ Mandac Dios mandashcacunaca cashcata ruhuac cashpami almatapish mushucyachin. Mandac Dios yachachishca shimicunaca imatapish pactachic cashpami, yanga runacunatapish allita yachachin.

⁸ Mandac Dios mandashcacunaca cashcata ruhuac cashpami shungutapish cushichin. Mandac Dios yachachishca mandashcacunaca chuya cashpami ñahuitapish pascan.

⁹ Mandac Diosta manchanaca chuyami, shinallatac huiñaipacmi canga. Mandac Dios mandashcacunaca mana llullachu, cashcallata mandashcacunami.

¹⁰ Sumaimana curitapish yalli munanami. Ashtahuan alli bunga mishquitapish yalli mishquimi.

¹¹ Canta servic ñucaca chai shimicunahuanmi cunashca cani. Chaicunata cazucpica sumac japinami tiyan.

¹² ¿Pitac paillatac pandarishcataca yachai pudinyari? ¡Mandac Dioslla, ñuca mana yuyarishca juchacunataca perdonaiyari!

¹³ Shinallatac canta servic ñucataca jatun tucuna yuyaimanta cuidangui. Chai yuyai shamushpa, ñucata mishachunca ama saquinguichu. Chashna cuidacpimi, ima pandata mana ruhuasha. Shinallatac canta mana cazushpa mana juchallisha.

¹⁴ Canca jatun rumi shina ñucata pacac, ñucata quishpichicmi cangui. Ñuca canman nishcacunapish, ñuca shungupi yuyashcapish can chasquinalla cashca cachun.