SALMOS 18 - Dios Rimashcata Quillcashcami

Macanacuita atishpa David cantashcamanta

Cantaccunata pushac cantachichun, Mandac Diosta servic David ruhuashca cantomi. Caitaca Mandac Dios Saulpac maquimantapish, shuctac piñaccunapac maquimantapish quishpichi punzhami Mandac Diosta pagui nishpa cantarca.

¹ Mandac Dioslla, cantaca cuyanimi. Canca ñucapac jarcarina jatun pirca shinami cangui.

² Mandac Dioslla, jatun rumimari cangui. Ñucata cuidashpa, llaquimantapish quishpichicmi cangui. Ñuca Dioslla, muyundita jarcac jatun pirca shinami cangui. Canpimi miticusha. Ñucata jarcac escudomi cangui. Tucuimanta yalli jatun ñuca miticunamari cangui. Ñucata quishpichicmi cangui.

³ Mandac Dios cantami mañasha. Canca alabanatacmi cangui. Canta mañashpami piñaccunapac maquimanta quishpichishca casha.

⁴ Huañuchic llaquicunami pilluc shina japirca. Millaicunaca jatun yacu jundac shinami yallita manchachirca.

⁵ Seolman ringapac ña huatashca shinami carcani. Huañuchic tucllatami churarcacuna.

⁶ Llaquihuan cashpaca Mandac Diostami caparishpa mañarcani. Ñuca mañashcataca paipac huasimantami uyarca. Ñuca caparishcaca paipac ringrimanmi uyarirca

⁷ Pai piñaricpica, cai pachaca mancharinatami chucchurca. Jatun urcu callari rumicunapish chucchurcami.

⁸ Paipac singamantaca cushnimi llucshirca. Shimimantaca tucuchic ninami llucshirca. Nina carboncunami chaimanta llucshicurca.

⁹ Jahua pachata pascashpami urai shamurca. Paipac chaqui ucupica amsa puyumi tiyarca.

¹⁰ Shuc querubinpi tiyarishpami volarca. Huaira alascunapi tiyarishpami rirca.

¹¹ Pai miticungapacca amsa tutatami churarca. Cortina shinatami paipac muyundita churarca. Jahua catataca tamyanalla tendiricuc yana puyutami churarca.

¹² Paipac achic nicucmantaca puyupish, rundupish, jagan nicuc nina carbonpish llucshirca.

¹³ Jahua pachapi causac Mandac Diosca tulun nishpami uyarirca. Rundupish, jagan nicuc nina carbonpish urmarcami.

¹⁴ Piñaccunataca paipac rayohuanmi caita chaita callpachirca. Paipac relampahuanmi paicunataca tucuchirca.

¹⁵ Mandac Dioslla, can piñarishpa pucucpica, mama cucha ucu allpapish, cai pacha callari rumicunapish ricurircami.

¹⁶ Diosmari jahuamanta paipac maquita chutashpa, ñucataca manchana jatun yacumanta llucchirca.

¹⁷ Ñucata piñac, mai sinchi gentecunapac maquimantami ñucata quishpichirca. Paicunaca ñucata yalli mai sinchicunami carca.

¹⁸ Paicunaca ñucapac llaqui punzhami llaquichingapac japircacuna. Chashna cacpipish, Mandac Diosmi ñucata ayudarca.

¹⁹ Paica ñucata cuyashcamantami jatun pambaman llucchishpa quishpichirca.

²⁰ Mandac Diosca ñuca cashcata ruhuashpa causac cacpimi allicunata curca. Ñuca maquihuan ima millaita mana ruhuashcamantami cuna cashcataca curca.

²¹ Ñuca Mandac Dios mandashca shinami paimanta mana caruyashpa causarcani. Ñuca Diosmantaca mana caruyarcanichu.

²² Pai yachachishcacunataca yuyaipimi charini. Pai quillcashpa mandashcamantaca mana anchurishcanichu.

²³ Paipac ñaupapi allita ruhuashpami, tucui millaimanta huacaichirishpa causarcani.

²⁴ Mandac Diosca ñuca cashcata ruhuashpa causac cacpimi allicunata curca. Ñuca maquihuan ima millaita mana ruhuashcamantami cuna cashcataca curca.

²⁵ Llaquiccunahuanca llaquic cashcallatatacmi ricuchingui. Mana pandaric runamanca canpish allicunallatatacmi ruhuangui.

²⁶ Mapa illac runamanca chuya cashcatami ricuchingui. Ashtahuanpish millaita ruhuactaca yallitami llaquichingui.

²⁷ Yangalla gentecunataca quishpichinguimi. Ashtahuanpish jatun tucushcacunataca cumurichinguimi.

²⁸ Mandac Dioslla, canmi ñuca lamparataca japichishpa charingui. Ñucata Mandac Dios canmi amsapi cacpipish achicyachingui.

²⁹ Canhuanmi achca soldadocunatapish mishasha. Ñuca Dios-huanca jatun pircacunatapish urmachishami.

³⁰ Dios ruhuashcacunapica ima pandai mana tiyanchu. Paipac rimashca shimicunapish rupachishca cullqui shina tucui mapa illacmi. Canpi jarcariccunapacca escudo shinami cangui.

³¹ Mandac Dios shinaca pi shuctac mana tiyanchu. Ñucanchicta jarcac jatun pirca shina Diosca pi shuctac mana tiyanchu.

³² Diosmi alli chumbillichic shina fuerzata cun. Paimi ñucataca mana pandarishpa causachun cuidan.

³³ Paimi ñuca chaquicunatapish taruga chaqui shina callpacta ruhuan. Jahua urcucunapipish ima manchai illactami charin.

³⁴ Paimi jatun macanacuipi macanacuchunpish ñuca rigracunata yachachin. Chashna yachachicpimi, bronce arcotapish cachari pudini.

³⁵ Canmi, cambac alli maquihuan ñucata allipi churashpa escudo shina jarcashpa quishpichingui.

³⁶ Ñuca chaquicuna ama lluchcarichunmi ñuca purina ñantapish allichingui.

³⁷ Ñucata piñaccunata cati rishpa llaquichircanimi. Paicunata tucuchishpatacmi cutircani.

³⁸ Urmachishpa ñutushpami chingachircani. Ñuca chaqui ucumantaca mana jatarircacunachu.

³⁹ Chumbillichic shina fuerzata cushpami jatun macanacuipipish mishachingui. Ñucata piñaccunataca ñuca chaqui ucupimi churangui.

⁴⁰ Ñucata piñaccunataca catishpami callpachircangui. Chashna ruhuacpimi, ñucata piñaccunataca tucui tucuchircani.

⁴¹ Paicuna caparicpipish pi mana ayudarcachu. Can Mandac Diostapish mañarcacunami, canpish mana uyarcanguichu.

⁴² Paicunataca ñuto allpata huairapi chingachic shinami chingachircani. Ñanpi siric turuta shinami sarurcani.

⁴³ Ñuca llacta gentecuna yallita juchanchicpipish, quishpichishpami llactacunata jatun mandacta ruhuarcangui. Ñuca mana ricsishca gentecunapish ñucata servircacunami.

⁴⁴ Ñuca mañashcata uyashcahuanmi cazurcacuna. Shuctac llactamanta gentecunami ñucata alli nincuna.

⁴⁵ Paicunaca manchaihuan chucchushpami, paicunapac ucumanta llucshin.

⁴⁶ ¡Mandac Diosca causacunmi! ¡Ñuca jarcarina jatun rumica alli nishca cachun! Ñucata quishpichic Diosca jatunyachishca cachun.

⁴⁷ Paica ñucata llaquichiccunata llaquichic Diosmi. Shuctac gentecunata ñuca chaqui ucupi churacmi.

⁴⁸ Piñaccunapac maquimanta quishpichingui. Ñucata llaquichiccunapac jahuapi ñucata churangui. Huañuchicpac maquimantami quishpichircangui.

⁴⁹ Chaimantami Mandac Dioslla, tucui llacta gentecunaman canmanta huillasha. Cambac shutitaca salmocunahuanmi cantacushalla.

⁵⁰ Pai churashca jatun mandactaca jatun macanacuitapish mishachinmi. Davidtapish, paipac huahuacunatapish cuyashpami, huiñaita pushanga.