SALMOS 17 - Dios Rimashcata Quillcashcami

Cashcata ruhuac runa Diosta mañashcamanta

David Diosta mañashcami.

¹ Mandac Dioslla, uyaiyari. Ñucaca cashcallatami mañani. Ñuca caparishpa mañashcata uyaiyari. Cai mañashcacunaca mana llullachu.

² Imapish allicunaca cambac ñaupamantami shamun. Ñuca allita ruhuashcataca ricuiyari.

³ Canca ñuca shungutaca tucuitami ricushcangui. Tutapish ricungapac shamushcanguimi. Ñuca alli cacta, mana alli cacta taripashpapish, ima mana allitaca mana tarishcanguichu. Ñuca shimihuan cambac contra mana rimangapacmi yuyarircani.

⁴ Mana shuccuna shina millaita rimanichu. Cambac mandashca shimicunata cazushpami millaicunapac ñantapish mana catircani.

⁵ Ñuca chaqui ama lluchcarichunmi cambac ñanllata catircani.

⁶ Dioslla, uyaiyari. Can uyaclla cacpimi mañani. Cambac ringrihuan ñuca mañashca shimicunata uyaiyari.

⁷ Canmi llaquichiccunapac maquimanta cambac alli maquihuan quishpichingui. Can yallita cuyashpa, sumaimanacunata ruhuashcata canpi shunguta churaccunaman ricuchiyari.

⁸ Cambac ñahui santa luzta shina cuidaiyari. Cambac alas ucupi pacaiyari.

⁹ Chashna ñucata piñashpa llaquichic millaicunamantapish, ñucata huañuchingapac muyucuccunamantapish pacaiyari.

¹⁰ Chaicunaca huira tapashca shungucunami. Jatun tucushpami imatapish rimancuna.

¹¹ Ñucanchicta huañuchishpa shitangapacmi muyunacushpa chapacuncuna.

¹² León imata japingapac chapacuc shinami chapancuna. Huahua león shinami miticushpa sirincuna.

¹³ ¡Mandac Dioslla jatariyari! ¡Paicunahuan shayarishpa, paicunata cungurichiyari! Millai gentecunapac maquimanta cambac espadahuan quishpichiyari.

¹⁴ Paicunapac maquimantaca cambac maquihuan cacharichiyari. Mandac Dioslla, paicuna japinataca ñami cai pachapi charincuna. Paicunaca can cushcatami huicsa pactata micuncuna. Huahuacunamanpish yallitami charincuna. Quipa huahuacunamanpish puchunmi.

¹⁵ Ashtahuanpish ñucaca cashcata ruhuac cashcamantami cambac ñahuita ricusha. Ñuca riccharishpaca cambac ñahuita ricushpami mai cushicusha.