SALMOS 16 - Dios Rimashcata Quillcashcami

Mandac Diosmanta allita japinamanta

Mictam tonopi cantana David ruhuashca cantomi.

¹ Dioslla, canpimi miticuni, ñucata cuidaiyari.

² Ñuca almalla Mandac Diostaca: «¡Canmi ñucata mandac cangui! Ñucapacca canmanta ashtahuan shucca pipish mana tiyanchu.

³ Cai pachapi cambac caccunahuan, ima pandata mana ruhuaccunahuanmi yallita cushicuni» nircami.

⁴ Shuctac diosta serviccunaca yallitami nanaicunahuan canga. Ñucaca chai dioscunamanca ima animalcunapac yahuarta cushpa, mana chirapashachu. Chaicunapac shuticunataca mana rimashachu.

⁵ Mandac Dioslla, canmi ñucamanca imatapish cungui. ¡Ñuca causaica cambac maquipimi!

⁶ Ñucaman cungapac allpata medicpica, sumac allpatami japircani. Ñucaman cushca allpaca sumaimanami carca.

⁷ Mandac Diostaca alli nishami. Paimi ñucataca sumacta riman. Tutacunaca ñuca yuyaipimi riman.

⁸ Ñuca causaipica Mandac Diostami tucuipac ñaupapi churani. Pai ñuca alli ladopi cacpica, imapish mana cuyuchingachu.

⁹ Chaimantami ñuca shunguhuan, ñuca almahuan paimanta cushicuni. Ñuca cuerpopish imata mana manchashpami samaringa.

¹⁰ Ñuca almata Seolpica mana saquinguichu. Cambaclla ñuca aichatapish mana ismuchun saquinguichu.

¹¹ Ñucamanca causaiman apac ñantami ricuchingui. Cambac ñaupapica yallita cushicuimi tiyan. Cambac alli ladopica huiñaitami cushicui tiyan.