SALMOS 150 - Dios Rimashcata QuillcashcamiTocanacunahuan Diosta alabanamanta 1 ¡Mandac Diosta alabaichicyari! ¡Sumac Diostaca paipaclla huasipi alabaichicyari! ¡Pai ruhuashca sumaimana jahua pachapipish alabaichicyari! 2 ¡Jatun mancharinacunata ruhuashcamanta alabaichicyari! ¡Jatun Diostaca pai mai jatun cashcamanta alabaichicyari! 3 ¡Cornetapi tocashpa alabaichicyari! ¡Salteriopi, arpapi tocashpa alabaichicyari! 4 ¡Panderopi tocashpa, danzashpa alabaichicyari! ¡Flautapi, cuerdayuc tocanacunapi tocashpa alabaichicyari! 5 ¡Chilin nic platillocunapi huactashpa alabaichicyari! ¡Sinchita chilin nic platillopi huactashpa alabaichicyari! 6 ¡Tucui samaita chariccuna alabaichicyari! ¡Mandac Diosta alabaichicyari! |
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.
United Bible Societies