SALMOS 149 - Dios Rimashcata Quillcashcami

Israelcunata Mandac Diosta alli nina cashcamanta

¹ ¡Mandac Diosta alabaichicyari! Mandac Diostaca mushuc cantohuan cantaichicyari. Mandac Diospaclla tandanacushcapi alabaichicyari.

² Israelcuna, cancunata ruhuac Dios-huan cushicuichicyari. Sión pueblopi causaccunapish cancunata jatun Mandac-huan cushicuichicyari.

³ Paipac shutitaca danzashpa alabaichicyari. Paitaca panderopi, arpapi tocashpa cantaichicyari.

⁴ Mandac Diosca pai acllashcacunahuanmi cushicun. Yangalla gentecunataca quishpichishpami sumacta ruhuanga.

⁵ Paipaclla causaccunaca Diospac sumaimana cashcahuanmi cushicunga. Chashnami paicunapac camapi cashpapish, paipac shutita cushicushpa cantangacuna.

⁶ Cancunapac cungahuan caparishpa, Diosta jatunyachichic. Ishcai filoyuc espadata maquipi apashca caichic.

⁷ Chaica, shuctac llactapi causaccuna llaquichishcamanta paicunatapish chashnallatac llaquichingapac chashna charicuichic.

⁸ Paicunata jatun mandaccunataca grillo fierrocunahuan churachishpa prezuichic. Paicunapac alli nishca runacunataca cadenacunahuan huatashpa prezuichic.

⁹ Paicunata llaquichingapac quillcashca pactachun chashna llaquichichic. Chaimi paipaclla causaccunapacca mai cushicuna canga. ¡Mandac Diostaca alabaichicyari!