SALMOS 148 - Dios Rimashcata Quillcashcami

Tucui Dios ruhuashcacuna paita alabana cashcamanta

¹ ¡Mandac Diosta alabaichicyari! ¡Jahua pachapi caccuna Mandac Diosta alabaichicyari! ¡Jahua pachapi alabaichicyari!

² ¡Tucui paipac angelcuna alabaichicyari! ¡Tucui paipac soldadocuna alabaichicyari!

³ ¡Intipish, quillapish alabaichicyari! ¡Achic nicuc lucerocunapish alabaichicyari!

⁴ ¡Jahua pachamanta ashtahuan jahuapi cac pachacunapish alabaichicyari! ¡Jahua pachapi tiyac yacucunapish alabaichicyari!

⁵ Mandac Dios mandacpimi, tucui imapish ruhuarirca. Chaimanta paipac shutita alabaichicyari.

⁶ Chaicunataca huiñai huiñaipacmi pi mana cuyuchipacta churarca. Maita mana shuctacyachipac mandanatami churarca.

⁷ Cai pachapi causaccunamanta callarishpa, mama cuchapi tiyac manchana animalcunapish, ucuman tiyac jatun yacucunapish, Mandac Diosta alabaichicyari.

⁸ Rayopish, rasupish, rundupish, puyupish, pai rimashcata pactachic acapana huairapish,

⁹ urcucunapish, tucui lomacunapish, granota pucuc yuracunapish, tucui cedro yuracunapish,

¹⁰ charina animalcunapish, sacha animalcunapish, aisarishpa puric animalcunapish, alasyuc animalcunapish,

¹¹ cai pachapi jatun mandaccunapish, tucui gentecunapish, tucui mandaccunapish, tucui cai pachapi tiyac juezcunapish,

¹² mosocunapish, solteracunapish, yuyaccunapish, tucui huahuacunahuan tandanacushpa alabaichicyari.

¹³ Mandac Diospac shutica mai alli nina shutimi. Chaimanta paita alabaichicyari. Paimi cai pachatapish, jahua pachatapish ricucun.

¹⁴ Paimi, pai acllashcacunapac mandanatapish sinchiyachin. Diosta tucui caticcuna paita alabachun. Israelcunapish, paicunapac cuchullapi causaccunapish paita alabaichicyari. ¡Mandac Diostaca alabaichicyari!