SALMOS 147 - Dios Rimashcata Quillcashcami

Dios Jerusalenpi causaccunata ayudacpi, pagui nishcamanta

¹ ¡Mandac Diosta alabaichicyari! Ñucanchic Diosta salmocunahuan cantanaca allitami. Paita alabanaca sumaimanami.

² Mandac Diosca Jerusalenta cutinllatac shayachicmi. Israelcunata prezushpa aparishcata cutichimucmi.

³ Shungu paquirishcacunata allichicmi. Chugricunata jambishpa tapachicmi.

⁴ Paica lucerocunatapish yupashpami charin. Tucui chaicunataca shutipimi cayan.

⁵ Ñucanchic Diosca tucuita ruhuac jatun Diosmi. Paipac yachaica mana tucuripacmi.

⁶ Mandac Diosca yangalla gentecunata ayudacmi. Ashtahuanpish paita mana manchaccunataca allpacaman cumurichicmi.

⁷ Mandac Diostaca cantashpa alabaichicyari. Ñucanchic Diostaca arpapi tocashpa cantaichicyari.

⁸ Paimi jahua cielocunata puyuhuan tapashpa tamyata allpaman cachangapac allichin. Paimi urcucunapipish quihuata huiñachin.

⁹ Paimi animalcunamanpish micunata cun. Cuervocunapac huahuacuna micunata mañacpipish paimi caran.

¹⁰ Paica yallita callpac caballocunahuanpish, yalli sinchi runacunahuanpish mana cushicunchu.

¹¹ Mandac Diosca paita manchaccunahuan shinallatac pai llaquichun shuyaccunahuanmi cushicun.

¹² ¡Jerusalenlla, Mandac Diosta alli niyari! ¡Sión pueblolla, cambac Diosta alabaiyari!

¹³ Cambac pungucunapi sinchi alabaccunata churashcamanta alli niyari. Cambac chaupipi causac huahuacunataca bendiciarcami.

¹⁴ Cambac llactapi cushi causaita cushpami, micuchunpish alli trigota mana nicta caran.

¹⁵ Paimi cai pachaman paipac rimashcata cachan. Chai rimashcaca utcami pactan.

¹⁶ Paimi rasutapish millmata shina urmachin. Casatapish uchupata shina tallin.

¹⁷ Paimi rasutapish granizota shina cachan. Chai chiripica, ¿pitac puri pudingayari?

¹⁸ Chaicunataca paipac rimashcahuanmi yacuyachin. Huairata cachashpami, yacutaca caiman chaiman cuyuchin.

¹⁹ Paimi Jacobopac huahuacunaman pai rimashcataca huillarca. Israelcunamanca mandashcacunatapish, pactachichun cushca shimicunatapish curcami.

²⁰ Shuctac llactacunahuanca mana chashna ruhuarcachu. Pai yachachishcacunataca mana ricsincunachu. ¡Mandac Diosta alabaichicyari!