SALMOS 146 - Dios Rimashcata Quillcashcami

Cashcata ruhuac Mandac Diosta alabanamanta

¹ ¡Mandac Diosta alabaichicyari! ¡Ñuca almalla, Mandac Diosta alabaiyari!

² Ñuca causaipica Mandac Diostami alabasha. Ñuca causashcacamanca salmocunahuanmi Diostaca cantasha.

³ Mandaccunapipish, huañuclla runapipish ama shunguta churaichicchu. Paicunaca mana quishpichi pudinchu.

⁴ Paicunapac samai tucuricpica, allpallamantacmi cutinga. Chai punzhallatacmi paicuna imata yuyaricushcapish tucuringa.

⁵ Jacobopac Dios ayudashca causaccuna cushicuichic. Mandac Diospi shunguta churashpa causaccuna cushicuichic.

⁶ Diosca jahua pachatapish, cai pachatapish, mama cuchatapish, chaicunapi tucui tiyaccunatapish ruhuacmi. Paica huiñaita cashcata nicmi.

⁷ Paica llaquichishca causaccunaman cashcata ruhuacmi. Yarcaihuan caccunaman caracmi. Mandac Diosca llaquipi causaccunata cacharichicmi.

⁸ Mandac Diosca mana ricuccunata ñahuita pascacmi. Mandac Diosca urmashcacunata jatarichicmi. Mandac Diosca cashcata ruhuaccunata cuyacmi.

⁹ Mandac Diosca, pozashpalla causaccunata cuidacmi. Taita mama illac huahuacunamanpish, viudacunamanpish caracmi. Shina cashpapish paita mana manchaccunamanta causaita quichunmi.

¹⁰ Mandac Diosca huiñaitami mandanga. Sionpi causaccunalla, cancunapac Diosmi huahua huahuacunacaman mandanga. ¡Mandac Diosta alabaichicyari!