SALMOS 145 - Dios Rimashcata Quillcashcami

Tucuita Mandac Diosta alabanamanta

Diosta alabangapac David ruhuashca Salmomi.

¹ Ñuca jatun Mandac Dioslla, cantaca jatunyachishami. Cambac shutitaca huiñaitami alli nicusha.

² Punzhantami alli nisha. Cambac shutitaca huiñaitami alabasha.

³ Mandac Diosca jatunmi, tucui mashna alabana Diosmi. Pi mana yachai pudipac Diosmi.

⁴ Imata can ruhuashcacunataca huahua huahuami yuyarishpa cushicungacuna. Tucuita ruhuac cashcahuan can Dios ruhuashcacunataca catipimi huillangacuna.

⁵ Achic nicuc sumaimana jatun Dios can sumaimana ruhuashcacunata huillacpica, chai sumaimanacunatami yuyaricushalla.

⁶ Pi mana ruhuaipac jatun mancharinacunata can ruhuashcata huillacpica, ñucapish can sumaimana ruhuashcacunataca huillashami.

⁷ Can yallita cuyac cashcatami yuyarishpa huillangacuna. Cashcata ruhuashcamantami cantangacuna.

⁸ Mandac Diosca cuyac llaquic Diosmi. Yallita llaquicpish, shinallatac mana utca piñaric Diosmi can.

⁹ Mandac Diosca tucuihuanmi alli. Tucui pai ruhuashcacunaca pai llaquishcamantami tiyan.

¹⁰ Mandac Dioslla, tucui can ruhuashcacunami cantaca alabangacuna. Cambaclla causaccunapish cantaca alli ningacunami.

¹¹ Can sumaimana jatun Mandac cashcatapish, tucuita ruhuac cashcatapish huillachuncuna.

¹² Jatun mancharinacunata can ruhuashcataca, huañuclla gentecunaman ricsichichuncuna. Can mandacuc llactapish sumaimana achic nicuc cashcata huillachuncuna.

¹³ Can mandanaca huiñai huiñaitami. Can mandashpa causanaca huahua huahuacunacamanmi.

¹⁴ Mandac Diosca tucui urmashcacunatami charicun. Llaquichishcacunatapish tucuitami jatarichin.

¹⁵ Tucuimi canllata chapacuncuna. Paicuna micunataca micuna horasmi carangui.

¹⁶ Cambac maquita pascashpami tucui causaita chariccunaman mana nicta carangui.

¹⁷ Mandac Diosca, tucui causaipimi cashcata ruhuan. Imata ruhuashpapish llaquic cashcatami ricuchin.

¹⁸ Mandac Diosca, mana nic tucushpalla paita mañaccunapac cuchupimi.

¹⁹ Paita manchaccuna ima munashcataca pactachingami. Shinallatac caparishpa mañashcata uyashpami quishpichinga.

²⁰ Mandac Diosca tucui paita cuyaccunataca cuidanmi. Ashtahuanpish paita mana manchaccunataca tucuitami tucuchinga.

²¹ Ñuca shimica Mandac Diostami alabanga. ¡Jucha illac can Diospac shutitaca huiñai huiñaita alabachuncuna!