SALMOS 144 - Dios Rimashcata Quillcashcami

Jatun mandac Diosta pagui nishcamanta

David ruhuashca Salmomi.

¹ Ñuca miticuna jatun rumi shina Mandac Diosca alli nishca cachun. Paimi ñuca maquitapish, dedotapish jatun macanacuipi macanacuchun yachachin.

² Paica ñucata llaquicpish, ñucata cuidac, ñuca miticuna jatun torre shinami can. Ñuca quishpichicmi, ñucata pacac escudomi. Paipimi ñuca shunguta churani. Paimi pueblocunapi causaccunataca ñuca mandachun cun.

³ Mandac Dioslla, ¿runa ima cacpitac yuyaringuiyari? ¿Imamantatac huañuclla runataca valic cashcata shina charinguiyari?

⁴ Gentecunaca samai shinallami. Paicuna causana punzhacunaca llandu shinallami.

⁵ Mandac Dioslla, cambac jahua pachata pascashpa urai shamuiyari. Urcucunapi tuparishpa cushnichiyari.

⁶ Cambac relampahuan achicyachishpa manchachiyari. Canta piñaccunataca rayocunata shitashpa upayachiyari.

⁷ Jahua pachamanta cambac maquita chutashpa ñucata quishpichiyari. Ñucaca jatun yacupimi aguaricuni. Shuctac llacta gentecunapac maquimanta quishpichiyari.

⁸ Paicunaca llullallatami rimancuna. Alli maquita alzashpami llullancuna.

⁹ Sumac Dioslla, cantaca mushuc cantohuanmi cantasha. Chunga cuerdayuc tocanapi tocashpami cantasha.

¹⁰ Canmi jatun mandaccunatapish macanacuipi mishachingui. Canmi canta servic Davidtaca espadapi huañunamanta quishpichircangui.

¹¹ Shuctac llacta gentecunapac maquimanta quishpichiyari. Paicunaca llullallatami rimancuna. Alli maquita alzashpami llullancuna.

¹² Ñucanchic churicunaca cunanlla huiñacuc yuracuna shina huiñachun. Ñucanchic ushicunapish mandana huasi pilarcuna shina sumac ricunalla cachun.

¹³ Ñucanchic taquicunapish tucuilaya granocunahuan junda cachun. Ñucanchic animalcunapish michina pambapi huaranga huarangata mirachun.

¹⁴ Huagracunapish yapungapac sinchi cachun. Ñucanchicta macashpa quichungapacpish ama shamuchun. Ñucanchic plazacunapi huacanacuipish ama tiyachun.

¹⁵ Chashna sumac causaita chariccunaca alli nishca cachun. ¡Paicunapac Dios Mandac Dios cashcamantamim chashna alli nishca cancuna!