SALMOS 143 - Dios Rimashcata Quillcashcami

Llaquimanta llucchishpa allita pushachun mañashcamanta

David ruhuashca Salmomi.

¹ Mandac Dioslla, ñuca mañashcata uyaiyari. Ñuca huacashpa mañashcata uyaiyari. Can cashcata nic cashcamanta, shinallatac cashcata ruhuac cashcamanta ñuca mañashcata uyaiyari.

² Cambac ñaupapica cashcata ruhuacmi cani nishpaca pi mana ningachu. Canta servictaca ama taripaichu.

³ Ñucata piñaccunaca catirashpami llaquichicun. Ñuca causaitaca allpapi shitashpami, ña huañushcata shina, amsapi causachun churashca.

⁴ Ñucapi cac almaca yallita llaquihuanmi huañucun. Ñuca shunguca llaquihuanmi upayashca.

⁵ Ñaupa huatacuna can imata ruhuashcacunata yuyarishpami, cambac maquihuan allicunata ruhuashcata yuyaricurcani.

⁶ Chaita yuyarishpami cambacman ñuca maquicunata chutani. Ñuca almaca chaquishca allpa tamyata shuyac shinami canta shuyacun.

⁷ Mandac Dioslla, ñuca mañashcata utca cutichiyari. Ñucaca huañunalayami tucuni. Cambac ñahuita ama pacaichu. Can mana ricucpica, ña enterrashcalayami casha.

⁸ Canllapimi shunguta churani. Chaimanta can yallita cuyac cashcataca tutamanta huillaiyari. Ñuca ima shina causanata yachachiyari. Ñuca almataca canmanmi mingarcani.

⁹ Mandac Dioslla, ñucata piñaccunamanta quishpichiyari. Ñucaca canllapimi miticuni.

¹⁰ Canca ñuca Diosmi cangui. Cambac munaita ruhuanata yachachiyari. Cambac alli Espirituca alli ñanta pushachun.

¹¹ Mandac Dioslla, cambac shutimanta ñucaman causaita cuiyari. Cashcata ruhuac cashcamanta ñuca almata llaquimanta llucchiyari.

¹² Ñucaca canta servicmi cani. Ñucata llaquishcamanta ñucata piñaccunata tucuchiyari. Ñucata mana ricunayachiccunata tucui chingachiyari.