SALMOS 142 - Dios Rimashcata Quillcashcami

Shuc runa llaquilla cashpa Diosta mañashcamanta

David machaipi cashpa, Diosta mañashca rimaicunata yachachingapac paillatac ruhuashca Salmomi.

¹ Mandac Diostaca caparishpami mañasha. Ñucata llaquichunmi Mandac Diostaca caparishpa mañasha.

² Ñuca llaquilla cashcataca paipac ñaupapimi ricuchisha. Ñuca yallita llaquihuan cashcataca paipac ñaupapimi huillasha.

³ Llaquihuan ñuca shungu paquiricpica, canmi ñuca ñanta yachangui. Ñuca purina ñanpimi linchita churarcacuna.

⁴ Ñuca alli ladota chapai ñucata ayudacca pi mana tiyanchu. Ñucata pacacpish, ñuca causaita cuidacpish pi mana tiyanchu.

⁵ Chaimantami Mandac Dios canta mañashpaca: «Canmi ñuca shungu churanaca cangui. Canllami cai pachapica ñuca japina cangui» nircani.

⁶ Ñucaca yallitami llaquihuan cani. Ñuca caparishpa mañashcata uyaiyari. Ñucata llaquichiccunamanta quishpichiyari. Paicunaca ñucata yalli sinchicunami.

⁷ Cambac shutita alli ningapac prezumanta ñuca almata llucchiyari. Can ñucaman allita ruhuacpimi, cashcata ruhuaccunaca ñucata muyungacuna.