SALMOS 141 - Dios Rimashcata Quillcashcami

Mana allimanta huacaichichun Diosta mañashcamanta

David ruhuashca Salmomi.

¹ Mandac Dioslla, cantaca caparinica. Utca shamuiyari. Canta mañacunica, uyaiyari.

² Ñuca mañashcaca incienso cushni shina mishquilla cambac ñaupaman chayashca cachun. Cambac ladoman ñuca maquicunata chutashcaca chishi lado ofrendata cushca shina cachun.

³ Mandac Dioslla, ñuca shimi ama imatapish rimarichunca cuidacta churaiyari. Ñuca shimi punguta cuidaiyari.

⁴ Ñuca shungu mana allicunata yuyarichun ama saquichu. Millaita ruhuaccunahuan tandarishpa millaita ruhuachunpish ama saquichu. Paicunapac jatun mizapi cushicuchunpish ama saquichu.

⁵ Cashcata ruhuac runa ñucata llaquichishpaca allimi canman. Shina cashpapish millaita ruhuaccunapac aceiteca ama ñuca umapi churashca cachun. Ñucaca punzhantami mana allita ruhuashcacunata piñashpa mañacushalla.

⁶ Paicunapac juezcuna jatun rumi quingraipi shitashca cacpimi, ñuca rimashcaca alli cashcata ricungacuna.

⁷ Yapushpa allpata ñutuchic shinami ñucanchic tullucunataca Seolman shitashca.

⁸ Mandac Jatun Dioslla, ñuca ñahuihuanca canllatami chapacuni. Canllapimi miticuni. Ñuca almataca ama shitashpa saquichuyari.

⁹ Ñucata urmachingapac churashca linchicunamanta, millai gentecunapac tucllamanta cuidaiyari.

¹⁰ Canta mana manchaccunaca paicuna churashca linchillapitac urmachun. Paicuna chashna cacpica ñucaca ñaupaman rishpami catisha.