SALMOS 140 - Dios Rimashcata Quillcashcami

Dios cuidachun mañashcamanta

Cantaccunata pushac cantachichun, David ruhuashca Salmomi.

¹ Mandac Dioslla, millai gentecunamanta quishpichiyari. Llaquichic gentecunamanta huacaichiyari.

² Paicunapac shungupica llaquichina yuyaillami purincuna. Shinallatac punzhantami piñanacuipi churancuna.

³ Paicunapac calluca culebrapac callu shina puntasapami. Paicunapac shimicunapish culebrapac veneno shinami.

⁴ Mandac Dioslla, canta mana manchacpac maquimanta quishpichiyari. Ñuca causaita pandachisha nic llaquichic gentecunamanta cuidaiyari.

⁵ Chai jatun tucushca gentecunaca ñucata urmachingapacmi linchitapish, chacnarina huascacunatapish churashca. Ñuca ñan cuchupimi chacnarishpa urmanata churashca.

⁶ Ñucaca Mandac Diostaca: «¡Canca ñuca Diosmi cangui!» nircanimi. Mandac Dioslla, ñuca yallita mañacuctaca uyaiyari.

⁷ Ñucata quishpichic Mandac Dioslla, canmi jatun macanacui punzhapica ñuca ama huañuchun cuidarcangui.

⁸ Mandac Dioslla, canta mana manchaccuna paicuna munashcata pactachichunpish, paicuna yuyashcata ruhuashpa, jatun tucuchunpish ama saquichu.

⁹ Ñucata llaquichingapac catic gentecuna yuyashca llaquicunaca paicunallatatac japichun.

¹⁰ Paicunapac jahuapica rupacuc nina urmachun. Maita mana llucshipac nina jatun jutcupi shitashca cachun.

¹¹ Imatapish rimaric runaca cai pachapica mana unaita causangachu. Llaquichic runataca millaillatacmi tangac shina apashpa tucuchinga.

¹² Mandac Dios huacchacunata cuidac cashcatapish, cashcata ruhuac cashcatapish yachanimi.

¹³ Cashcata ruhuaccunami cantaca pagui ningacuna. Allita ruhuaccunallami cambac ñaupapica causangacuna.