SALMOS 14 - Dios Rimashcata Quillcashcami

Rumi shungu mana entendic gentecunamanta

Cantaccunata pushac pushashpa cantachun David ruhuashca Salmomi

¹ Muspa runaca: «Diosca mana tiyanchu» ninmi. Tucuimi ismushca shina tucushpa, millana juchacunata ruhuancuna. Allita ruhuacca shucllapish mana tiyanchu.

² Paita mashcac alli yuyaiyucca maijanllapish tiyangami nishpami, Mandac Diosca huañunalla gentecunataca jahua pachamanta ricurca.

³ Ashtahuanpish tucuimi paimanta anchurishpa, ismushca shina tucushca. Allita ruhuacca pi mana tiyanchu. Shucllapish mana tiyanchu.

⁴ Mandac Diosta mana mañac, millai gentecunaca, ima allitaca mana entendincunachu Ñuca acllashcacunataca tandata micuc shinami tucuchincuna.

⁵ Paicunaca cashcata ruhuaccunata Mandac Dios cuidacta ricushpami, manchaihuan chucchuncuna.

⁶ Huacchacuna ima ruhuana cashcata uyashpaca burlancunami. Shina cacpipish huacchacunataca Mandac Diosmi cuidacun.

⁷ ¡Israelcunata quishpichicca Sionmanta shamushpachari alli canman! Mandac Diosca, pai acllashca israelcunapuramanta prezu apashcacunata cutichimushpami alli canman. Chaipica Jacobopac tucui huahua huahua israelcunami cushicunga.