SALMOS 139 - Dios Rimashcata Quillcashcami

Dios tucuita ricuc, tucuita yachac cashcamanta

Cantaccunata pushac cantachichun, David ruhuashca Salmomi.

¹ Mandac Dioslla, ñucataca canmi ricurcangui. Canmi ricsircangui.

² Ñuca tiyarinatapish, ñuca jatarinatapish canmi ricsingui. Carumantami ñuca imata yuyacushcatapish yachangui.

³ Ñuca maipi puricucpipish, sueñucucpipish tucuitami yachangui. Ñuca causaitapish tucuitami ricsingui.

⁴ Mandac Dioslla, canca ñuca imata rimangapac manarac shimita cuyuchicpimi, tucuita yachangui.

⁵ Huashatapish, ñaupatapish muyunguimi. Maquitapish ñuca jahuapimi churangui.

⁶ Cambac yachaica sumaimanami. Canca jatun yachacmi cangui. Cambac yachaitaca mana entendinichu.

⁷ ¿Cambac Espiritumantaca maimantac caruyashayari? ¿Cambac ñaupamantaca maipitac miticugrishayari?

⁸ Jahua pachaman huichai ricpipish chaipimi cangui. Seolman urai ricpipish chaipimi cangui.

⁹ Tutamanta alascunahuan rishpa, mama cucha tucuripi causagricpipish,

¹⁰ cambac maquihuanmi pushangui. Cambac alli lado maquihuanmi charirangui.

¹¹ Ñuca: «Amsa tutapish pacangami, ñuca muyundipi tiyac achicpish purayangami» nishpa yuyacucpipish,

¹² cambac ñahuimantaca amsa tutapish mana purayachingachu. Tutaca achic punzha shinami. Canmanca amsapish, achicpish chashnallatacmi can.

¹³ Canmi ñuca tucui cuerpotaca ruhuarcangui. Ñuca mamapac huicsapi cacpica canmi huiñachircangui.

¹⁴ Can chashna sumaimanata ruhuashcamantaca pagui ninimi. Can ruhuashcacunaca sumaimanami. Chaitaca ñuca almapish allitami yachan.

¹⁵ Ñuca pacalla huiñacushpapish, cambac ñaupapica, mana pacallachu carcani. Allpa ucupi shina huiñacushpapish, mana pacalla cai pudircanichu.

¹⁶ Muyu shina ñuca huiñai callaricucpimi canca ña ricurcangui. Tucui chaicunatami cambac libropi ña quillcarcangui. Ñuca causai punzhacuna manarac tiyacpimi ña yupashca carcani.

¹⁷ ¡Dioslla, cambac jatun yuyaica sumaimanami! ¡Tucui chai yuyaicunaca maita mana entendipacmi!

¹⁸ Chaicunata yupai callaricpica, tiyutapish yalli achcami ricuringa. Riccharishpapish canllahuantacmi cani.

¹⁹ ¡Sumac Dioslla, canta mana manchac runataca huañuchiyari! ¡Chai huañuchic gentecunataca ñucamanta anchuchiyari!

²⁰ Paicunaca cantaca camincunami. Canta piñaccunaca cambac shutitaca yangami rimancuna.

²¹ Mandac Dioslla, ¿manachu canta piñaccunataca piñana cani? ¿Manachu canta mana ricunayachic gentecunataca mana ricunayachina cani?

²² Ñucaca paicunataca tucui shunguhuanmi piñani. Ñuca yuyaipica paicunaca ñucata piñaccunami can.

²³ Mandac Dioslla, ñucatapish, ñuca shungutapish tucuita ricuiyari. Ñuca yuyaicuna ima shina cashcata callarishpa ricuiyari.

²⁴ Ñucaca millaita ruhuarcanichari, chaitaca ricuiyari. Chaicunata ricushpa huiñaita causangapac rina ñanta pushaiyari.