SALMOS 137 - Dios Rimashcata Quillcashcami

Babiloniaman prezu apashcamanta

¹ Babilonia llacta yacu ladocunapi tiyarishpami, Sión pueblota yuyarishpa huacac carcanchic.

² Ñucanchic arpacunataca sauce yura chaupicunapimi huarcuc carcanchic.

³ Chaipi prezushpa llaquichiccunaca cantachunmi mañaccuna carca. Ñucanchicta llaquichiccuna cushilla cachun mañashpaca: «Sión cantocunata ñucanchicman uyachichic» niccunami carca.

⁴ ¿Ima shinatac Mandac Diospac cantocunataca mana ricsishca llactapica cantashunyari?

⁵ Jerusalenlla, canta cungaricpica, ñuca alli maqui chaquichun.

⁶ Jerusalenlla, canta cungarishpa, canmanta tucuimanta yalli mana cushicucpica, ñuca callu shimipi llutarichun.

⁷ Mandac Dioslla, edomitacunata yuyariyari. Jerusalenta llaquichicuc punzhapica paicunaca: «Urmachichic. Callari rumicunatapish ama saquishpa urmachichic» nircacunami.

⁸ Chingarina Babilonialla, ¡ñucanchicta llaquichishcamanta chai shinallatac llaquichicca alli nishca cachun!

⁹ ¡Cambac huahuacunata jatun rumicunapi huactacca alli nishca cachun!