SALMOS 136 - Dios Rimashcata QuillcashcamiMandac Diosca huiñaita cuyac cashcamanta 1 Mandac Diosca allimi, chaimanta paita alabaichicyari. ¡Paica huiñaita llaquicmi! 2 Tucui dioscunapac Diosta alabaichicyari. ¡Paica huiñaita llaquicmi! 3 Mandaccunata Mandacta alabaichicyari. ¡Paica huiñaita llaquicmi! 4 Paillami jatun mancharina sumaimanacunataca ruhuarca. ¡Paica huiñaita llaquicmi! 5 Alli yuyaihuan jahua pachata ruhuac Diostaca alabaichicyari. ¡Paica huiñaita llaquicmi! 6 Cai pachata yacu jahuapi tendic shina ruhuac Diosta alabaichicyari. ¡Paica huiñaita llaquicmi! 7 Jatun achicyachiccunata ruhuac Diosta alabaichicyari. ¡Paica huiñaita llaquicmi! 8 Intitaca punzhanta achicyachichun churac Diosta alabaichicyari. ¡Paica huiñaita llaquicmi! 9 Quillata, lucerocunata tuta achicyachichun churac Diosta alabaichicyari. ¡Paica huiñaita llaquicmi! 10 Egiptopi causaccunapac punta churicunata huañuchic Diosta alabaichicyari. ¡Paica huiñaita llaquicmi! 11 Israelcunata Egiptomanta llucchimuc Diosta alabaichicyari. ¡Paica huiñaita llaquicmi! 12 Tucuita ruhuac paipac maquita chutashpa llucchimuc Diosta alabaichicyari. ¡Paica huiñaita llaquicmi! 13 Puca cuchata ishcai partepi chaupic Diosta alabaichicyari. ¡Paica huiñaita llaquicmi! 14 Israelcunata chai yacu chaupita pasachimuc Diosta alabaichicyari. ¡Paica huiñaita llaquicmi! 15 Faraonta paipac soldadocunandi Puca Cuchapi shitac Diosta alabaichicyari. ¡Paica huiñaita llaquicmi! 16 Pai acllashcacunata shitashca pambapi michic shina pushac Diosta alabaichicyari. ¡Paica huiñaita llaquicmi! 17 Jatun mandaccunatapish tucuchic Diosta alabaichicyari. ¡Paica huiñaita llaquicmi! 18 Jatun sinchi mandaccunatapish huañuchic Diosta alabaichicyari. ¡Paica huiñaita llaquicmi! 19 Amorreocunata jatun mandac Sehonta huañuchic Diosta alabaichicyari. ¡Paica huiñaita llaquicmi! 20 Basán llactata jatun mandac Ogta huañuchic Diosta alabaichicyari. ¡Paica huiñaita llaquicmi! 21 Chai llactacunata israelcunaman cuc Diosta alabaichicyari. ¡Paica huiñaita llaquicmi! 22 Paita servic israelcunaman chai allpacunata cuc Diosta alabaichicyari. ¡Paica huiñaita llaquicmi! 23 Ñucanchic llaquipi causacucta yuyaric Diosta alabaichicyari. ¡Paica huiñaita llaquicmi! 24 Ñucanchicta piñaccunapac maquimanta quishpichic Diosta alabaichicyari. ¡Paica huiñaita llaquicmi! 25 Tucui causaccunaman micunata carac Diosta alabaichicyari. ¡Paica huiñaita llaquicmi! 26 Jahua pacha Diosta alabaichicyari. ¡Paica huiñaita llaquicmi! |
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.
United Bible Societies