SALMOS 135 - Dios Rimashcata Quillcashcami

Mandac Diosta pagui nishpa cantanamanta

¹ ¡Mandac Diosta alabaichicyari! ¡Mandac Diosta serviccuna, paipac shutita alabaichicyari!

² Mandac Diospac huasipi caccunapish, ñucanchic Diospac huasi canzha pambapi caccunapish alabaichicyari.

³ Mandac Diosca allimi, chaimanta alabaichicyari. Mandac Diosca sumacmi, chaimanta salmocunahuan cantaichicyari.

⁴ Mandac Diosmi Jacobotaca acllarca. Israelcunatapish paimi paipaclla cachun chicanyachirca.

⁵ Ñucaca Mandac Dios jatun cashcataca yachanimi. Ñucanchic Diosca tucui dioscunamanta yalli jatunmi.

⁶ Mandac Diosca jahua pachapipish, cai pachapipish, mama cuchatapish, chaipi tucui tiyaccunatapish, yacucunapipish pai munashcatami ruhuan.

⁷ Paimi tucui cai pachamanta puyuta huichaiman apan. Tamyachunpish relampatami cachan. Paimi huaira llucshinamanta huairatapish llucchin.

⁸ Paimi Egiptopi tucui punta huacharishca huahuacunatapish, animalcunatapish huañuchirca.

⁹ Egiptopi causaccunalla, cancunapac chaupipimi ima ricuchinacunatapish, jatun mancharinacunatapish ruhuashpa ricuchirca. Chashnami Faraontapish, tucui paipac gentecunatapish llaquichirca.

¹⁰ Paimi achca llactacunata tucuchirca. Yalli sinchi jatun mandaccunatapish huañuchirca.

¹¹ Amorreocunata jatun mandac Sehontapish, Basán llactata jatun mandac Ogtapish shinallatac tucui Canaán llactapi causac jatun mandaccunatapish huañuchirca.

¹² Tucui chaicunapac llactacunataca pai acllashca israelcunapac cachunmi curca.

¹³ Mandac Dioslla, cambac shutica huiñaipacmi. Mandac Dioslla, huahua huahuacamanmi cantaca yuyaricungalla.

¹⁴ Mandac Diosmi pai acllashcacunataca taripanga. Paita serviccunataca llaquingami.

¹⁵ Shuc llactacunapi causaccunapac dioscunaca runacuna paicunapac cullquimanta, curimanta ruhuashcallami.

¹⁶ Shimita charishpapish mana rimarinchu. Ñahuita charishpapish mana ricunchu.

¹⁷ Ringrita charishpapish mana uyanchu. Paicunapac shimihuanca samaillatapish mana aisanchu.

¹⁸ Chaita ruhuaccunaca paicuna shinallatacmi. Chai dioscunapi shunguta churaccunapish chashnallatacmi.

¹⁹ ¡Tucui israelcuna Mandac Diosta alli nichicyari! ¡Aaronpac huahua huahuacuna Mandac Diosta alli nichicyari!

²⁰ ¡Levipac huahua huahuacuna Mandac Diosta alli nichicyari! ¡Mandac Diosta manchaccuna Mandac Diosta alli nichicyari!

²¹ ¡Mandac Diosca Jerusalenpimi causan! ¡Paica Sionmanta pacha alli nishca cachun! ¡Mandac Diosta alabaichicyari!