SALMOS 132 - Dios Rimashcata Quillcashcami

Diospac huasita bendiciachun mañashcamanta

Huichai rishpa cantanami.

¹ Mandac Dioslla, Davidtapish, pai llaquita apashcatapish yuyariyari.

² Pai can Mandac Dios-huan ari nishcatapish yuyariyari. Paillatacmi, Jacobopac tucuita ruhuac Diostaca:

³ «Ñuca huasimanca mana yaicushachu. Ñuca camamanpish mana huichicushachu.

⁴ Ñuca ñahuitapish mana sueñuchun saquishachu. Ñahuillatapish mana huichcashachu.

⁵ Chashnami Mandac Diospac huasita ruhuana pushtuta, Jacobopac tucuita ruhuac Dios causana huasita taringacaman mana samarisha» nirca.

⁶ Arcamantaca Efrata pueblopimi uyarcanchic. Achca yuracuna tiyac pambapimi tarircanchic.

⁷ ¡Dios-huan tupana huasiman jacuchic! Chaiman yaicushpa paipac chaqui saruna ñaupapi cungurishunchic.

⁸ Mandac Dioslla, poderyuc Arcandi can samarina pushtuman shamuiyari.

⁹ Cambac curacunaca cashcata ruhuanata churarishca shina cachun. Cambaclla caccunaca yallita cushicuchun.

¹⁰ Canta servic Davidta cuyashcamanta jatun mandac cachun aceitehuan cahuishca mandactaca ricuraiyari.

¹¹ Mandac Diosca pactachishatacmi nishpami Davidhuan ari ninacushpaca: «Can mandashpa tiyarinapica cambac huahua huahuapurallatatacmi churasha.

¹² Paicuna ñucahuan ari nishcatapish, ima shina causanata ñuca yachachishcatapish pactachishpaca, huiñaitami can mandashpa tiyarinapica tiyaringa» nirca.

¹³ Mandac Dios Sión pueblota acllashpa, chaipi causanata munashpaca:

¹⁴ «Caipimi ñucaca huiñaita causasha. Caipi causanata munashpami acllarcani.

¹⁵ Achca micunatami bendiciasha. Huacchacunapish mana nictami micunga.

¹⁶ Shinallatac curacunamanca quishpirishca churanatami churachisha. Diospaclla causaccunaca cushicushpami caparingacuna.

¹⁷ Chaipimi David mandanataca cutinllatac callarichisha. Aceitehuan cahuishca ñuca jatun mandactami lamparahuan achicyachic shina achicyachisha.

¹⁸ Paita piñaccunamanca churanata churachic shinami pingaichisha. Ashtahuanpish paipac umapica, jagan nicuc coronatami churachisha» nirca.