SALMOS 13 - Dios Rimashcata Quillcashcami

Llaquihuan cashpa Diosta mañanamanta

Cantaccunata pushac pushashpa cantachun David ruhuashca Salmomi.

¹ Mandac Dioslla, ¿ima horascamantac cungarigringuiyari? ¿Huiñaitachu saquigringui? ¿Ñucamantaca maicamantac ñahuita pacagringuiyari?

² ¿Maicamantac ñuca shungupi llaquiricushayari? ¿Ima horascamantac ñuca yuyaipica punzhanta chai yuyailla cashayari? ¿Maicamantac ñucata piñacca jatun tucushpa ñucata ricungayari?

³ ¡Mandac Dioslla, ñucata ricushpa uyaiyari! Achic punzhata ricuchun saquiyari, huañuchunca ama saquichu.

⁴ Ñucata piñacca: «¡Mishanimi!» ningami. Ñucata piñaccunaca ñuca urmacpica cushicungami.

⁵ Ashtahuanpish ñucaca can llaquic cashcatami yuyacuni. Can quishpichic cashcamantami ñuca shunguca cushicun.

⁶ Mandac Diosta alabashami. Paica allitami ñucamanca ruhuashca.