SALMOS 127 - Dios Rimashcata Quillcashcami

Tucui imapish Mandac Dios cuidacpi, tiyac cashcamanta

Huichai rishpa cantanami. Salomón ruhuashca cantomi.

¹ Mandac Dios mana huasichicpica, yangallami huasichic runacunaca huasichincuna. Mandac Dios pueblota mana cuidacpica, yangallami cuidaccunaca cuidancuna.

² Yangallami cancunaca utca trabajoman llucshishpa, tutayanata samaringapac cutinguichic. Micungapacllami shaicucta trabajanguichic. Diosca pai cuyashcacunataca sumactami samachin.

³ Riqui, huahuacunaca Mandac Dios cushcami. Cancunapac aichamanta llucshishca huahuacunaca tucuimanta yalli valicmi.

⁴ Mosorac runacuna charishca churicunaca sinchi runapac maquipi cac flechacuna shinami.

⁵ Huasi junda chashna churicunata charic runaca cushicunmi. Juezcunapac ñaupapi paita piñaccunahuan rimarinacushpapish mana pingaichishcachu canga.