SALMOS 124 - Dios Rimashcata Quillcashcami

Piñaccunamanta quishpichicpi Diosta pagui nishcamanta

Huichai rishpa cantanami. Caica David ruhuashca cantomi.

¹ Mandac Dios mana ñucanchicmanta shayarishca cacpica, aij ñucanchiclla. Israelcuna cutin nichic:

² «Mandac Dios ñucanchicmanta mana shayarishca cacpica, ¡aij ñucanchiclla! Tucui llactacunapi causaccuna ñucanchic-huan macanacungapac jatarishpaca,

³ causactami tucuchinman carca. Paicunaca nina japiric shinami ñucanchic-huanca piñarirca.

⁴ Jatun yacupimi ucuyanchicman carca. Jatun yacupi apashca shinami canchicman carca.

⁵ Chai manchana yacu jatarishpami, ñucanchic jahuata pasanman carca» nichicyari.

⁶ Mandac Diosca alli nishca cachun. Paicuna quirucunahuan ñucanchicta pitinacushpa tucuchichunca mana saquircachu.

⁷ Zhutacunata japiccunapac linchimanta zhutata cacharichic shinami quishpichirca. Paicunapac linchi lliquiricpimi, cacharircanchic.

⁸ Ñucanchicta ayudacca jahua pachatapish, cai pachatapish ruhuac Mandac Diospac shutipimi can.