SALMOS 122 - Dios Rimashcata Quillcashcami

Jerusalenpi cushi causai tiyachun mañashcamanta

Huichai rishpa cantanami. Caica David ruhuashca cantomi.

¹ Ñucaca: «Diospac huasiman jacuchic» niccunahuanmi cushicurcani.

² Mandac Dioslla, ñucanchicca Jerusalén pungucunata yaicushpami shayacunchic.

³ ¡Jerusalén puebloca allita pircashpa ruhuashca pueblo shina sinchita shayachishcami!

⁴ Chaimanmi Mandac Diospac shutita alabangapac Israel aillucunapish, Mandac Dios acllashca Israel aillucunapish, tandanacushca israelcunapish huichai rincuna.

⁵ Chaipica cashcata ruhuashpa taripanapish, Davidpac huahua huahuacuna mandashpa tiyarinapish tiyacunmi.

⁶ Jerusalenpi cushi causai tiyachun mañashpaca: «Canta cuyaccunaca cushilla causachun.

⁷ Cambac muyundi jatun pirca ucupipish, cambac chaupipi cac mandana huasicunapipish cushilla causai tiyachun» nichicyari.

⁸ Ñuca huauquicunamantapish, ñuca ricsishcacunamantapish ñucaca: «Cushi causai canhuan cachun» ninimi.

⁹ Ñucanchicta Mandac Diospac huasita cuyashcamantami can alli cachun munani.