SALMOS 121 - Dios Rimashcata Quillcashcami

Mandac Dios pai acllashcacunata cuidac cashcamanta

Huichai rishpa cantanami.

¹ Urcucunata huichai ricushpaca: «¿Maimantatac ñucata ayudacca shamunga?» nini.

² Ñucata ayudacca Mandac Diosmantami shamun. Paimi jahua pachatapish, cai pachatapish ruhuarca.

³ Cambac chaqui lluchcarichunca mana saquingachu. Canta cuidacca mana sueñungachu.

⁴ Riqui, israelcunata cuidacca huiñaita mana sueñunchu. Israelcunata huacaichicca riccharishcami can.

⁵ Mandac Diosmi cantaca huacaichicun. Mandac Diosmi cambac alli ladopi shayarishpa llandunga.

⁶ Punzhaca intipish mana llaquichingachu. Tutaca quillapish mana imata ruhuangachu.

⁷ Mandac Diosmi tucui mana allimanta cuidanga. Cambac causaitapish paimi huacaichinga.

⁸ Can yaicucpipish, llucshicpipish Mandac Diosmi cuidanga. Cunanmanta huiñaicamanmi cuidanga.