SALMOS 12 - Dios Rimashcata Quillcashcami

Millaicunata quishpichichun Diosta mañanamanta

Cantaccunata pushac pusac cuerdayuc tocanacunahuan cantachichun David ruhuashca Salmomi.

¹ Mandac Dioslla, canta cazuccunaca pi mana saquirinchu. ¡Chaimanta quishpichiyari! Huañuclla runacunapurapica, canta caticcunaca ña illanmi.

² Caishuc chaishucmi shuctac runacunahuan llullanacuncuna. Imatapish nic tucuclla, mishqui shimi jayac shungucunami.

³ Mandac Diosca chai llullac mishqui shimicunata, jatun tucushpa rimaccunataca tucuitami tucuchinga.

⁴ Chaicunaca: «Ñucanchictaca pi mana upallachingachu. Ñucanchic rimaihuanca mishashunllami. ¿Pitac ñucanchictaca mandanga?» nincunami.

⁵ Mandac Diosca: «Huacchacunataca yallitami llaquichincuna. Imata mana chariccunapish quishpichichunmi caparishpa mañancuna. Chaimantami cunanca quishpichigrini» ninmi.

⁶ Mandac Diospac shimicunaca hornopi canchis cutin rupachishpa tucui mapata anchuchishca chuya cullqui shina mapa illacmi.

⁷ Mandac Dioslla, ñucanchictaca cuidanguiyari. Cai millai gentecunamantaca huiñaita huacaichinguiyari.

⁸ Millai runacunata tucui alli nicpimi, paicunaca maipipish muyucuncuna.