SALMOS 119 - Dios Rimashcata Quillcashcami

Dios mandashcacunaca mai alli cashcamanta Alef

Alef

¹ Mandac Dios mandashcacunata cazushpa, ima millaitapish mana ruhuashpa causaccunaca maimi cushicun.

² Ima shina causanata yachachishcata pactachingapac tucui shunguhuan mashcaccunaca maimi cushicun.

³ Pai munashca shina causaccunaca ima millaita mana ruhuancunachu.

⁴ Dioslla, canmi tucui mandashcacunata pactachichun mandarcangui.

⁵ ¡Mandashcacunata pactachingapac ñuca causai alli cashpachari alli caiman!

⁶ Can mandashcacunata tucui pactachishpaca, mana pingaichishcachu casha.

⁷ Cashcata ruhuac cambac shimicunata yachacushpaca, tucui shunguhuanmi canta alabasha.

⁸ Can mandashcacunata pactachishpami causasha. Ñucata amatac cungaringuichu.

Bet

Bet

⁹ ¿Ima shinatac quipa huiñaicunaca paipac causaipi chuya canga? Cambac rimashcata cazushpami chuya canga.

¹⁰ Tucui ñuca shunguhuanmi cantaca mashcarcani. Can mandashcacunamanta anchurichunca amatac saquinguichu.

¹¹ Juchallishpa canta mana llaquichingapacca ñuca shungupimi, can rimashcacunata huacaichircani.

¹² ¡Mandac Dioslla, canca alli nishcami cangui! Can mandashcacunata yachachiyari.

¹³ Can mandashpa rimashcataca ñuca shimihuanmi callarishpa huillarcani.

¹⁴ Ima shina causanata can yachachishcata yachacushpaca tucui charishcacunamanta yallimi cushicurcani.

¹⁵ Can mandashcacunatami allita yuyarishpa, can munashca shina causasha.

¹⁶ Quillcashpa mandashcacunahuanmi cushicuni. Cambac rimashcacunataca manatac cungarishachu.

Guímel

Guímel

¹⁷ Can rimashcacunata cazushpa causangapac canta servic ñucaman allita ruhuaiyari.

¹⁸ Cambac sumaimana mandashcata ricungapac ñuca ñahuita pascaiyari.

¹⁹ Cai pachapica shamushpallami causacuni. Ñuca ñaupamanta can mandashcacunata ama pacaichu.

²⁰ Ñuca almaca can mandashcacunata yachanata munashpami punzhanta mai llaquiricun.

²¹ Jatun tucushcacunataca llaquichircanguimi. ¡Can mandashcacunamanta anchuricca llaquichishca cachun!

²² Ñucaca ima shina causachun can yachachishcacunatami cazurcani. Chaimanta pita mana valichishpa, yangapi churashpa rimana yuyaita ñucamanta anchuchiyari.

²³ Mandaccuna paicunapura tiyarishpa, ñucata rimacucpish, canta servic ñucaca pactachichun can cushca shimicunatami yuyaricurcani.

²⁴ Ima shina causanata can yachachishcacunaca cushichinmi, shinallatac alli yuyaitapish cunmi.

Dálet

Dálet

²⁵ Ñucaca huañunallami allpapi siricuni. Cambac shimihuan rimashca shina causaita cuiyari.

²⁶ Ñuca causaimanta canman huillacpica, uyarcanguimi. Can mandashcacunata yachachiyari.

²⁷ Cambac sumaimana shimicunataca yuyarirasha ninimi. Can mandashcacunata entendichiyari.

²⁸ Ñuca almaca llaquihuan tucuricunmi. Cambac shimihuan rimashca shina sinchiyachiyari.

²⁹ Llulla causaimanta anchuchishpa, can mandashcacunata yachachiyari.

³⁰ Mana llullashpa cantanatami acllarcani. Can mandashcacunataca punzhantami ñuca yuyaipi charini.

³¹ Mandac Dioslla, pactachichun can cushca shimicunapimi llutarishca shina causani. Amatac pingaipi saquinguichu.

³² Can ñuca shungupi cushicuita cushcamantami can mandashcacunataca utca pactachisha.

He

He

³³ Mandac Dioslla, mandashcacunata cazushpa causanata yachachiyari. Tucui ñuca causaipimi pactachishpa causasha.

³⁴ Alli yuyaita cuiyari. Can mandashcacunata cazushami. Chaitaca tucui shunguhuanmi pactachisha.

³⁵ Can mandashcacunapi nishca shina pushaiyari. Ñucaca chaicunahuanmi cushicusha.

³⁶ Ñuca shungutaca ima shina causanata can yachachishcata cazuchun ayudaiyari. Charinallata munachunca ama saquinguichu.

³⁷ Ñuca ñahui ima mana allicunata ricuchunca ama saquinguichu. Cambac ñanpi alli catingapac sinchiyaichicyari.

³⁸ Can imata cusha nishcataca canta manchac canta servicman pactachiyari.

³⁹ Camiccunamanta ñucata caruyachiyari. Can mandashcacunaca mai allimi.

⁴⁰ Riqui, ñucaca can mandashcacunata yachanatami munani. Canca imatapish cashcata ruhuashcahuan causaita cuiyari.

Vav

Vav

⁴¹ Mandac Dioslla, can cusha nishca shina can llaquinatapish, quishpichinatapish pactachiyari.

⁴² Chashna ruhuacpimi, ñucata piñaccunamanca cambac rimashcapi shunguta churashpa causashcata huillasha.

⁴³ Ñucaca canllatami shuyani. Chaimanta ñuca shimi manapish cashcata rimachunca amatac saquinguichu.

⁴⁴ Ñucaca huiñai huiñaitami can mandashcataca cazushpa causasha.

⁴⁵ Can mandashcacunata tucui yuyaihuan mashcashcamantaca, pi mana llaquichishcami purisha.

⁴⁶ Ima shina causanata can yachachishcataca jatun mandaccunapac ñaupapimi huillasha. Shinallatac mana pingaichishcachu casha.

⁴⁷ Can mandashcacunataca cuyarcanimi. Chai mandashcacunahuanmi cushicuni.

⁴⁸ Can mandashcacunataca cuyarcanimi. Chaimantami ishcai maquihuan chasquishpa, chai mandashcacunata yuyarishpa causani.

Zayin

Zayin

⁴⁹ Canta servic ñucaman can cusha nishcataca yuyariyari. Ñucaca chai yuyaillami shuyacuni.

⁵⁰ Can cusha nishcamantami llaquihuan cashpapish cushicuni. Chaillatacmi ñucamanca causaita cun.

⁵¹ Jatun tucushcacunaca yallitami burlashpa asircacuna. Shina cacpipish can mandashcamantaca manatac caruyarcanichu.

⁵² Mandac Dioslla, ñaupa huatacunapi taripashpa allita ruhuashcata yuyarishpami cushicurcani.

⁵³ Can mandashcacunata saquishpa millaita ruhuacta ricushpami yallita piñarircani.

⁵⁴ Caru llactapi puricucpica, can mandashcacunaca ñucamanca cantanami carca.

⁵⁵ Mandac Dioslla, cambac shutitaca tutacunami yuyarircani. Can mandashcataca cazurcanimi.

⁵⁶ Can mandashcacunata pactachishcamantami cashna allicunataca chasquircani.

Jet

Jet

⁵⁷ Mandac Dioslla, canllami ñucapac japinaca cangui. Can mandashcacunataca pactachishami nircanimi.

⁵⁸ Tucui shunguhuanmi alli cangapac canta mañarcani. Can nishca shina ñucataca llaquiyari.

⁵⁹ Ñuca causacushcata yuyarishpami, can yachachishca shina causai callarircani.

⁶⁰ Can mandashcacunataca mana unaiyashpa, utcami pactachi callarircani.

⁶¹ Canta mana manchaccuna tucllahuan urmachisha nishpa muyunacucpipish, can mandashcacunataca mana cungarircanichu.

⁶² Can cashcata ruhuashpa taripashcamantami, canta pagui ningapac chaupi tuta jatarini.

⁶³ Ñucaca tucui canta manchaccunahuan, can mandashcacunata cazuccunahuanmi apanacuni.

⁶⁴ Mandac Dioslla, tucui cai pachapi causaccunatami llaquingui. Can mandashcacunataca yachachiyari.

Tet

Tet

⁶⁵ Mandac Dioslla, can nishca shinami canta servicmanca allita ruhuashcangui.

⁶⁶ Can mandashcacunataca ñucaca crircanimi. Alli yuyaita cushpa, allita yachachiyari.

⁶⁷ Ñaupa can manarac llaquichicpimi pandarishpa causarcani. Ashtahuanpish cunanca cambac rimashcacunata cazushpami causani.

⁶⁸ Canca allimi cangui. Imatapish allitami ruhuangui. Can mandashcacunataca yachachiyari.

⁶⁹ Jatun tucushca gentecunaca ñucata yangami juchanchircacuna. Shina ruhuacpipish, tucui shunguhuanmi can mandashcacunata cazusha.

⁷⁰ Paicunapac shunguca huira tapashca shinami rumi shungu tucurca. Ashtahuanpish ñucaca can mandashcacunahuanmi cushicuni.

⁷¹ Allitami llaquichircangui. Chashna ruhuacpimi, can mandashcacunataca cazuni.

⁷² Ñucamanca can mandashcacunaca huaranga huaranga curitapish, cullquitapish yalli allimi.

Yod

Yod

⁷³ Cambac maquihuanmi ñucata ruhuarcangui. Can mandashcacunata allita yachacungapac ñucata entendichiyari.

⁷⁴ Canta manchaccuna ñucata ricushpaca cushicungami. Cambac rimashcapimi shunguta churashpa shuyacurcani.

⁷⁵ Mandac Dioslla, can cashcata ruhuashpa taripac cashcataca ricsinimi. Shinallatac ñucataca llaquichina cacpitacmi llaquichishcangui.

⁷⁶ Canta servic ñucaman can cushami nishca shina llaquishpa cushichiyari.

⁷⁷ Ñucaca can mandashcacunahuanmi cushicuni. Chaimanta ñuca causashpa catingapac llaquiyari.

⁷⁸ Jatun tucushcacunaca pingaichishca cachun. Paicunaca yanga llullashpami ñucataca llaquichirca. Shina cacpipish, can mandashcacunatami allita yuyarishpa causasha.

⁷⁹ Canta manchaccunapish, can yachachishca ima shina causanata ricsiccunapish ñucahuan tandanacuichic.

⁸⁰ Mana pingaichishca cangapacca can mandashcacunata tucui shunguhuan allita pactachicta ruhuaiyari.

Caf

Caf

⁸¹ Can quishpichinata shuyashpami ñuca almaca huañucun. Cambac rimashcapi shunguta churashpami shuyacuni.

⁸² Can nishcata pactachingapac shamucta shuyashpa, ñahui amsayashpaca: «¿Ima horastac ñucata cushichingapac shamunguiyari?» nircani.

⁸³ Cushnipi huarcushca cara shina cashpapish, quillcashpa mandashcataca mana cungarircanichu.

⁸⁴ ¿Canta servicca ima horascamantac causagrinyari? ¿Ima horastac ñucata llaquichiccunataca llaquichigringuiyari?

⁸⁵ Can mandashcacunata mana cazuc, jatun tucushcacunaca ñuca urmachunmi jutcuta ruhuashcacuna.

⁸⁶ Can mandashcacunaca cashcata nic shimicunami. Yangami llaquichincuna, chaimanta ayudaiyari.

⁸⁷ Cai allpamanta ñucata ña chingachigricucpipish, can mandashcacunataca manatac saquishcanichu.

⁸⁸ Can llaquishca shinallatac causaita cuiyari. Can rimashpa yachachishcataca pactachishami.

Lámed

Lámed

⁸⁹ Mandac Dioslla, can rimashcaca huiñaicamanmi jahua pachapi tiyacun.

⁹⁰ Huahua huahuacamanmi canca tucuita pactachicungui. Cai pachataca pi mana cuyuchipacta sinchitami ruhuarcangui.

⁹¹ Can mandacpimi, imapish cunancaman tiyacun. Tucui chaicunaca canta serviccuna can.

⁹² Can mandashcacuna ñucata mana cushichishca cacpica, ñucaca llaquipi huañuimanmi carcani.

⁹³ Can mandashcacunahuanmi ñucamanca causaita curcangui. Chaimanta jaicapi can mandashcacunataca mana cungarishachu.

⁹⁴ Cambacmi cani, can mandashcacunatami mashcarcani. Chaimanta quishpichiyari.

⁹⁵ Canta mana manchaccuna ñucata tucuchingapac chaparacucpipish, can ima shina causanata yachachishcatami yuyarisha.

⁹⁶ Ima allita ruhuashcapish tucurinallami. Ashtahuanpish can mandashcacunaca mana tucurinchu.

Mem

Mem

⁹⁷ ¡Can mandashcacunataca yallitami cuyani! Punzhantami chai yuyailla cani.

⁹⁸ Can mandashcacunahuanmi ñucata piñaccunamanta yalli, ashtahuan yachacta ruhuashcangui. Can mandashcacunaca tucui causaipimi ñucapac can.

⁹⁹ Ima shina causanata can yachachishcacunaca ñuca yallita yuyarishpa causangapacmi can. Chaimantami ñucata tucui yachachiccunatapish yalli ashtahuan yachacurcani.

¹⁰⁰ Can mandashcacunata cazushcamantami yuyaccunatapish atishpa entendini.

¹⁰¹ Can rimashcata pactachingapacmi ñuca chaqui mana alli ñanta rigricucpipish jarcarcani.

¹⁰² Canmi ñucata yachachic cangui. Chaimantami can yachachishcamantaca manatac anchurircani.

¹⁰³ ¡Cambac rimashcacunaca ñuca callupica mai mishquimi! ¡Mishquitapish yalli mishquimi!

¹⁰⁴ Can mandashcamantami alli yuyaita japircani. Shina cashcamantami llulla causaitaca piñani.

Nun

Nun

¹⁰⁵ Can rimashcaca ñuca chaqui sarunata achicyachicmi. Ñuca ñanta ricuchic luzmi.

¹⁰⁶ Imatapish cashcata ruhuangapacca can mandashcacunataca pactachishatacmi nishpami ari nircani.

¹⁰⁷ Mandac Dioslla, yallita llaquihuanmi cani. Can nishca shinallatac causaita cuiyari.

¹⁰⁸ Mandac Dioslla, ñuca shimihuan canta alli nishcataca chasquiyari. Can yachachishcatapish yachachiyari.

¹⁰⁹ Ñuca causaica punzhantami chingarinalla. Shina cacpipish can mandashcacunataca mana cungarircanichu.

¹¹⁰ Canta mana manchaccuna ima shinapish urmachisha nicucpipish, can mandashcacunataca mana cungarircanichu.

¹¹¹ Ima shina causanata can yachachishcaca ñucata cushichicmi. Chaimantami huiñaipac ñuca japina can.

¹¹² Can mandashcacunata huañungacaman punzhanta ñuca shungupica pactachina yuyaillami cani.

Sámej

Sámej

¹¹³ Mishqui shimi jayac shungucunataca piñanimi. Ashtahuanpish can mandashcataca cuyanimi.

¹¹⁴ Canca ñuca miticuna, ñucata pacac escudomi cangui. Can nishca pactachunmi shuyacuni.

¹¹⁵ Millai runacuna, ñucamanta anchurichic. Ñucaca, ñuca Dios mandashcacunatami pactachisha nini.

¹¹⁶ Can nishca shina ñucata ayudacpica causashami. Canllatami shuyacuni. Ama pingaichinguichu.

¹¹⁷ Cambac maquihuan ayudacpica quishpirishami. Can mandashcacunahuanmi punzhanta cushicusha.

¹¹⁸ Can mandashcacunata mana cazuccunataca millanayachinguimi. Paicunaca yangallatami yuyashpa causan.

¹¹⁹ Tucui cai pachapi causac canta mana cazuccunataca mapata shinami chingachircangui. Chaimantami ima shina causanata can yachachishcataca cuyani.

¹²⁰ Cambac ñaupapica ñuca cuerpoca chucchucunmi. Can llaquichinataca manchacunimi.

Ayin

Ayin

¹²¹ Ñucaca cashcata ruhuashpami allita ruhuarcani. Ama ñucata piñaccunapac maquipi saquichu.

¹²² Canta servic ñucataca allita pushaiyari. Chai jatun tucushcacuna ama yallita llaquichichunca jarcanguiyari.

¹²³ Can cashcata ruhuashpa quishpichicucta ricusha nishpami, shuyacushpalla ñuca ñahuipish amsayan.

¹²⁴ Canta servicmanca can llaquishca shina, can mandashcacunataca yachachiyari.

¹²⁵ Ñucaca canta servicmi cani. Can mandashca shina causanata yachacungapac alli yuyaita cuiyari.

¹²⁶ Mandac Dioslla, can mandashcacunataca yangata ruhuashpami mana cazuncuna. Paicunataca ñami imatapish ruhuana cangui.

¹²⁷ Chaimantami can mandashcacunataca curitapish, ashtahuan alli curitapish yalli cuyani.

¹²⁸ Chaimantami tucui can mandashcacunataca huacaichircani. Llulla causaitaca piñanimi.

Pe

Pe

¹²⁹ Ima shina causanata yachachishcaca sumacmi. Chaimantami ñucaca tucui yuyaihuan cazuni.

¹³⁰ Can yachachishpa rimashcaca achicyachinmi. Imata mana yachaccunamanpish alli yuyaita cunmi.

¹³¹ Shimita pascashpa samaita aisac shinami, can mandashcacunataca tucui munaihuan yachacuni.

¹³² Ñucapacman tigramuiyari. Cambac shutita cuyaccunata shinallatac ñucataca llaquiyari.

¹³³ Can yachachishca shina ñucataca pushaiyari. Imapish juchacuna ñucata mishachunca ama saquichu.

¹³⁴ Millai gentecunamanta quishpichiyari. Can mandashcacunataca pactachishami.

¹³⁵ Canta servic ñucataca cambac ñahuihuan achicyachishpa, can mandashcacunataca yachachiyari.

¹³⁶ Shuctac gentecuna can mandashcacunata mana cazucpica, huiqui yacu shina callpactami huacani.

Tsade

Tsade

¹³⁷ Mandac Dioslla, cashcata ruhuacmi cangui. Allita ruhuashpami taripangui.

¹³⁸ Ima shina causanata can yachachishcacunaca cashcallata yachachicmi. Shinallatac cashcata nic yachachishcacunami.

¹³⁹ Ñucata piñaccunaca cambac rimashcata cungarishcamantami, yallita llaquirishpa huañucuni.

¹⁴⁰ Cambac rimashcacunaca chuyami. Chaimantami canta servic ñucaca cuyani.

¹⁴¹ Ñucaca imapac mana valichishca yangalla runa cashpapish, can mandashcacunataca mana cungarircanichu.

¹⁴² Canca huiñaita cashcata ruhuacmi cangui. Can mandashcacunaca cashcata nicmi.

¹⁴³ Llaqui huacaicuna japicpipish, can mandashcacunahuanmi cushicurcani.

¹⁴⁴ Ima shina causanata can yachachishcaca huiñaita cashcata yachachicmi. Chai shina causangapac alli yuyaita cuiyari.

Qof

Qof

¹⁴⁵ Ñucaca tucui shunguhuanmi caparishpa mañani. Ñucata uyaiyari. Can mandashcacunataca cazushami.

¹⁴⁶ Cantami caparishpa mañani. Chaimanta quishpichiyari. Ima shina causanata can yachachishcata pactachishami.

¹⁴⁷ Manarac pacaricpi jatarishpami mañani. Can rimashcatami shuyacuni.

¹⁴⁸ Can mandashcacunata yuyaringapacmi, tutacunapish mana riccharina horaspi riccharircani.

¹⁴⁹ Mandac Dioslla, can cuyashca shina ñuca mañashcataca uyaiyari. Can cashcata ruhuac cashca shinallatac causaita cuiyari.

¹⁵⁰ Ñucata piñaccunaca ñami cuchuyamucuncuna. Can mandashcacunamanta anchurishpami puricuncuna.

¹⁵¹ Mandac Dioslla, canca ñuca cuchullapimi cangui. Can mandashcacunaca cashcata nic rimashcacunami.

¹⁵² Ima shina causanata can yachachishcataca ña unaitami yachani. Chaitaca huiñaipacmi churarcangui.

Resh

Resh

¹⁵³ Ñuca huacacucta ricushpa quishpichiyari. Ñucaca can mandashcataca mana cungarishcanichu.

¹⁵⁴ Ñucata ayudashpa quishpichiyari. Can nishca shina causaita cuiyari.

¹⁵⁵ Canta mana manchaccunaca can mandashcacunataca mana mashcancunachu. Chaimanta paicunaca mana quishpichishcachu canga.

¹⁵⁶ Mandac Dioslla, canca yallita llaquicmi cangui. Can cashcata ruhuac cashcamanta causaita cuiyari.

¹⁵⁷ Ñucata llaquichiccunapish, piñaccunapish taucami. Shina cacpipish, can mandashcacunamantaca mana anchurircanichu.

¹⁵⁸ Mana cazuccunaca can mandashpa rimashcacunataca mana cazunchu. Chaicunataca mana ricunayanchu.

¹⁵⁹ Mandac Dioslla, can mandashcacunata ñuca cuyactaca canllatacmi yachangui. Can llaquic cashca shinallatac causaita cuiyari.

¹⁶⁰ Tucui can rimashcacunaca cashcata nicmi. Cashcata ruhuashpa taripanaca huiñaipacmi.

Sin

Sin

¹⁶¹ Mandaccuna yanga ñucata llaquichicpipish, ñuca shunguca cambac rimashcacunata mancharcami.

¹⁶² Macanacushpa achcata japishpa cushicuc shinami, can rimashcahuanca yallitami cushicuni.

¹⁶³ Llullanataca piñashpa millanimi. Ashtahuanpish can mandashcataca cuyanimi.

¹⁶⁴ Cashcata can ruhuac cashcamantaca shuc punzhapi canchis cutinmi alabani.

¹⁶⁵ Can mandashcacunata cuyaccunaca yallita cushillami causancuna.

¹⁶⁶ Mandac Dioslla, can quishpichichunmi shuyashcani. Can mandashcacunata ruhuashpami causarcani.

¹⁶⁷ Ima shina causanata can yachachishcataca tucui yuyaihuanmi cazuni. Chaicunataca yallitami cuyarcani.

¹⁶⁸ Tucui ñuca causaitaca canllatacmi yachangui. Ima shina causanata yachachishcatapish, mandashcatapish cazushpami causani.

Tav

Tav

¹⁶⁹ Mandac Dioslla, ñuca caparishpa mañashcaca cambac ñaupaman chayashca cachun. Can rimashca shina alli yuyaicunata cuiyari.

¹⁷⁰ Ñuca mañashcaca cambac ñaupaman chayashca cachun. Can nishca shina quishpichiyari.

¹⁷¹ Can quillcashpa mandashcacunata yachachicpica, cantaca mana shaicushpami alabasha.

¹⁷² Tucui can mandashcacunaca cashcata ruhuacmi. Chaimantami ñuca calluca chai mandashcacunata cantanga.

¹⁷³ Can mandashcacunata cazungapacmi acllarcani. Chaimanta cambac maquihuan ayudac shamuiyari.

¹⁷⁴ Mandac Dioslla, can quishpichichunmi shuyacuni. Can mandashcacunahuanmi cushicuni.

¹⁷⁵ ¡Ñuca almaca canta alli nishpa causachun! ¡Can mandashcacunallatac ñucataca ayudachun!

¹⁷⁶ Ñucaca chingarishca oveja shinami purircani. Ñuca can mandashcacunata mana cungarishcamantaca, canta servic ñucata mashcaiyari.