SALMOS 118 - Dios Rimashcata Quillcashcami

Mandac Dios huiñaita llaquic cashcamanta

¹ ¡Mandac Diosca allimi, huiñaita llaquicmi! ¡Chaimanta paita alabaichicyari!

² Israelcuna: «¡Mandac Diosca huiñaita llaquicmi!» nichicyari.

³ Aaronpac huahua huahuacuna: «¡Mandac Diosca huiñaita llaquicmi!» nichicyari.

⁴ Mandac Diosta manchaccuna: «¡Mandac Diosca huiñaita llaquicmi!» nichicyari.

⁵ Ñuca llaquihuan cashpa Mandac Diosta mañacpica, paica uyashpami, ima llaqui mana tiyac pushtupi churarca.

⁶ Mandac Diosca ñucahuanmi. Maijan ñucata llaquichinamantaca mana manchashachu.

⁷ Mandac Diosca ñucahuanmi, ñucata ayudacmi can. Chaimanta ñucata mana ricusha nic gentecunataca ñuca munashca shina llaquita apacuctami ricusha.

⁸ Gentecunapi shunguta churanapac randica, Mandac Diospi shunguta churashpa causanami alli.

⁹ Jatun mandaccunapi shunguta churanapac randica, Mandac Diospi shunguta churashpa causanami ashtahuan alli.

¹⁰ Tucui llactacunapi causaccunami ñucata muyunacurca. Shina cacpipish Mandac Diospac shutipimi tucuchircani.

¹¹ Muyundita shayarishpami ñucata ricurcacuna. Shina cacpipish, Mandac Diospac shutipimi tucuchircani.

¹² Abejacuna shinami ñucata muyurcacuna. Casha rupacuc shinami yallita piñarcacuna. Shina cacpipish Mandac Diospac shutipimi ñucaca tucuchircani.

¹³ Ñucata tigrachingapacca sinchitami tangarcacuna. Shina cacpipish Mandac Diosmi ñucataca ayudarca.

¹⁴ Mandac Diosmi ñucata sinchiyachicpish, ñucata quishpichicpish ñuca cantana Diospish can.

¹⁵ Cashcata ruhuaccunapac carpa huasipica cushicuihuan cantashcapish, quishpichishcamanta rimashcapish uyarinmi. Mandac Diospac alli maquimi yallita mishacun.

¹⁶ Mandac Diospac alli maquica jahuaman churashpa alli nishcami. Mandac Diospac alli maquica aticunllami.

¹⁷ Mana huañushachu, ashtahuanpish Mandac Dios imata ruhuashcacunata huillangapacmi causasha.

¹⁸ Mandac Dios ñucata sinchita llaquichishpapish, mana huañuchun saquircachu.

¹⁹ ¡Cashcata ruhuaccuna yaicuna punguta pascaichic! Chaita yaicushpami Mandac Diosta pagui nisha.

²⁰ Caimi Mandac Diospac pungu. Cashcata ruhuaccunaca chai pungutami yaicunga.

²¹ Can ñuca mañashcata uyashcamanta, ñucata quishpichic cashcamantami pagui nisha.

²² Huasichiccuna mana nishca rumillatacmi, huasi callaripi churana tucuimanta yalli alli rumi tucushca.

²³ Chaitaca Mandac Diosmi ruhuashca. Chaica ñucanchicmanca sumaimanami ricurin.

²⁴ Cunan punzhaca Mandac Dios allicunata ruhuashca punzhami. ¡Chaimanta paihuan yallita cushicushunchic!

²⁵ ¡Mandac Dioslla, ñucata quishpichiyari! ¡Mandac Dioslla, allita pushaiyari!

²⁶ ¡Mandac Diospac shutipi shamucca alli nishca cachun! Mandac Diospac huasimantami cancunata alli ninchic.

²⁷ Mandac Diosca, Diosmi. Paimi ñucanchicta achicyachirca. Paiman cuna animalta altar gachucunapi huataichic.

²⁸ Ñuca Diosca canmi cangui. Cantami pagui nisha. Ñuca Dioslla, cantami jatunyachisha.

²⁹ ¡Mandac Diosca allimi! ¡Chaimanta paita alabaichicyari! ¡Paica huiñaita llaquicmi!