SALMOS 116 - Dios Rimashcata Quillcashcami

Huañuimanta quishpichicpi, pagui nishcamanta

¹ Mandac Diostaca cuyanimi. Paimi ñuca mañashcatapish, ñuca caparishcatapish uyarca.

² Paipac ringrihuanmi ñuca mañashcata uyarca. Chaimantami tucui ñuca causaipi paita mañacushalla.

³ Huañui llaquicunami pilluc shina japirca. Seolman rina llaquicunami ñucataca japirca. Llaquihuanpish, nanaihuanpish carcanimi.

⁴ Chaimantami Mandac Diostaca: «¡Mandac Dioslla, ñucata quishpichiyari!» nishpa mañarcani.

⁵ Mandac Diosca yallita cuyac, cashcata ruhuacmi. Ñucanchic Diosca chashna llaquic Diosmi.

⁶ Mandac Diosca yangalla runacunata ayudacmi. Ñucataca huañushca shina siricuctami quishpichirca.

⁷ Mandac Diosmi ñucamanca allita ruhuarca. Chaimanta ñuca almalla, sumacta samarilla.

⁸ Mandac Dioslla, canmi ñuca causaitaca huañuimanta quishpichircangui. Ñuca ñahuimantaca huiquita picharcangui. Ñuca chaqui lluchcarinamantapish jarcarcangui.

⁹ Mandac Diospac ñaupapimi, cai pachapi causaccunapac chaupipi purisha.

¹⁰ Ñucaca yalli llaquihuan cashpami crishpa cashna rimarcani.

¹¹ Yalli llaquihuan musparishpami: «Tucui gentecunami llullaccuna» nircani.

¹² Mandac Dios cai tucui allicunata ñucaman ruhuashcamanta, ¿imatatac paimanca cushayari?

¹³ Quishpichishcata ricuchic copata alzashpami, Mandac Diospac shutita mañacushalla.

¹⁴ Mandac Diosman ñuca imata cusha nishcataca pai acllashcacunapac ñaupapimi cusha.

¹⁵ Pai acllashcacuna huañucpica, Mandac Diosca llaquinmi.

¹⁶ Mandac Dioslla, ñuca mañashcata uyaiyari. Ñucaca canta servicmi cani. Canta servic huarmipac huahua, canta servicmi cani. Canmi huatashcamanta cacharichircangui.

¹⁷ Canta pagui nishpami, animalta huañuchishpa canman cusha. Mandac Dioslla, cambac shutitami mañasha.

¹⁸ Mandac Diosman ñuca imata cusha nishcataca pai acllashcacunapac ñaupapi,

¹⁹ Mandac Diospac huasi canzha pambapimi cusha. Jerusalenlla, cambac chaupipimi cusha. ¡Mandac Diosta alabaichicyari!