SALMOS 115 - Dios Rimashcata Quillcashcami

Ñucanchic Diosca jahua pachapi cashcamanta

¹ Mandac Dioslla, ama ñucanchicta alli nichuyari. Ashtahuanpish can llaquic cashcamanta, cashcata nic cashcamanta cambac sumaimana shutita alli niyari.

² ¿Imamantatac shuctac llactacunapi causaccunaca: «Cancunapac Diosca maipitacyari» ningacuna?

³ ¡Ñucanchic Diosca jahua pachapimi! ¡Pai munashcatami tucuita ruhuashca!

⁴ Paicunapac yanga dioscunaca cullquimanta, curimanta gentecunapac maqui ruhuashcami can.

⁵ Shimita charishpapish, mana rimanchu. Ñahuita charishpapish mana ricunchu.

⁶ Ringrita charishpapish mana uyanchu Singata charishpapish mana mutquinchu.

⁷ Maquita charishpapish mana maquita cunchu. Chaquita charishpapish mana purinchu. Cungata charishpapish imata mana rimarinchu.

⁸ Chaicunata ruhuaccunaca chai yanga dioscuna shinami. Chai dioscunapi shunguta churaccunapish, chaicuna shinallatacmi.

⁹ Israelcunalla, Mandac Diospi shunguta churaichicyari. Paimi cancunapac escudopish, ayudacpish can.

¹⁰ ¡Aaronpac huahua huahuacuna, Mandac Diospi shunguta churaichic! Paimi cancunapac escudopish, ayudacpish can.

¹¹ ¡Mandac Diosta manchaccuna, Mandac Diospi shunguta churaichic! Paimi cancunapac escudopish, ayudacpish can.

¹² Mandac Diosca ñucanchicta yuyarishcami. Ñucanchicta bendiciangami. Israelpac huahua huahuacunatapish, Aaronpac huahua huahuacunatapish bendiciangami.

¹³ Mandac Diosta manchaccunataca jatuncunatapish, uchillacunatapish bendiciangami.

¹⁴ Mandac Diosmi cancunataca yallita bendicianga. Cancunatapish, cancunapac huahua huahuacunatapish, bendiciangami.

¹⁵ Cancunataca jahua pachata cai pachata ruhuac Mandac Dios bendiciachun.

¹⁶ Jahuamanta ashtahuan jahua pachapish Mandac Diospacmi. Ashtahuanpish cai pachataca paillatacmi huañuclla gentecunaman cushca.

¹⁷ Huañushcacunapish, upalla cangapac urai riccunapish Mandac Diostaca mana alabai pudincunachu.

¹⁸ Ashtahuanpish ñucanchicca Mandac Diostami cunanmanta huiñai huiñaita alli nicushunlla. ¡Mandac Diosta alli nichicyari!