SALMOS 112 - Dios Rimashcata Quillcashcami

Mandac Diosta manchaccuna allita causanamanta

Mandac Diosta alabaichic.

¹ Mandac Diosta manchaccunaca cushicunmi. Pai mandashcacunapimi yallita cushicun.

² Paipac huahua huahuacunaca cai pachapica mai jatun nishcami canga. Allita ruhuacpac huahua huahuacunaca bendiciashcami canga.

³ Chai runapac huasipica charinacunapish, ima allicunapish tiyanmi. Pai cashcata ruhuashcapish huiñaipacmi canga.

⁴ Paica llaquicmi, caracmi, cashcata ruhuacmi. Cashcata ruhuaccunapacca amsapi luz achicyachicuc shinami.

⁵ Alli shungu runaca imatapish cushilla mañachinmi. Paita serviccunatapish cashcata ruhuashpami mandan.

⁶ Chaimantami paica manatac urmanga. Cashcata ruhuac runataca huiñaitami yuyaringacuna.

⁷ Ima llaquicuna japigrinmi nicpipish, paica mana manchanchu. Mandac Diospi paipac shunguta churashpa imatapish mana manchashpa causanllami.

⁸ Paipac shungupica imatapish mana manchanchu. Paita piñaccuna llaqui tucushcatapish ricungami.

⁹ Pai charishcacunataca huacchacunamanmi chaupishpa cun. Cashcata ruhuanataca manatac saquinchu. Paica tucuipac ricsishca jatun nishcami canga.

¹⁰ Diosta mana manchac runa chaita ricushpaca yallitami piñaringa. Paipac shungupi nanarishpami quirucuna caniringa. Diosta mana manchaccunapac yuyaica chingaringami.