SALMOS 111 - Dios Rimashcata Quillcashcami

Dios ruhuashcacunamanta pagui nishcamanta

¹ Mandac Diostaca, allita ruhuaccunahuan cashpa, jatun tandanacuipimi tucui shunguhuan alabasha.

² Mandac Dios ruhuashcacunaca jatunmi. Chashna allita ruhuachun munaccunaca paitami mashcan.

³ Pai ruhuashcacunaca sumaimana achicllami. Shinallatac huiñaita cashcata ruhuacmi.

⁴ Mandac Diosca cuyac llaquic cashpami, mana cungaripac allicunata ruhuarca.

⁵ Paita manchaccunamanca micunatami carashca. Paihuan ari nishcatapish, huiñaitami yuyaricunga.

⁶ Shuctac pueblota quichushpaca, pai imatapish ruhuac sumaimana cashcatami pai acllashcacunamanca ricuchirca.

⁷ Pai ruhuashcacunapica ima llulla mana tiyanchu. Cashcallata ruhuashcami. Pai mandashcacunaca ima pandaita mana charinchu.

⁸ Cai mandashcacunaca huiñai huiñaipac pi mana cuyuchipacmi. Chai mandashcacunaca mana llullashpa allita ruhuashcami.

⁹ Pai acllashcacunaman quishpichicta cachashpami, huiñai huiñaipac ari nirca. Paica jucha illac manchana Diosmi.

¹⁰ Yallita yachac cangapacca Mandac Diostaracmi manchana can. Tucui pai mandashcacunata ruhuashpa causaccunami alli yuyaita charin. Diosca huiñaita jatunyachishca cachun.