SALMOS 110 - Dios Rimashcata Quillcashcami

Dios acllashca jatun mandacmanta

David ruhuashca Salmomi.

¹ Mandac Diosmi ñucata Mandactaca: «Canta piñaccunata cambac chaqui sarunapi churangacaman ñuca ladopi tiyari» nirca.

² Mandac Diosca can mandana varataca Sión pueblomantami cachanga. Canta piñaccunapac chaupipimi mandanga.

³ Can sumaimana cashcahuan imatapish ruhuai punzhami, cambac soldadocunaca quiquin munaimanta shamungacuna. Tutamanta garua tamyahuan mushucyac shinami, punzhanta mushucllatac cangui.

⁴ Mandac Diosca paipac shimihuan rimashpaca: «Cantaca huiñaitami Melquisedec cura shina cachun churani» nirca. Chai nishcataca mana paquingachu.

⁵ Mandac Diosca cambac alli ladopimi tiyacun. Pai piñashca cai punzhacunapica jatun mandaccunatami tucuchinga.

⁶ Paimi llactacunapi causaccuna imalla ruhuashcataca taripanga. Llactacunapica yalli huañuimi tiyanga. Tauca llactacunapimi jatun mandaccunata tucuchinga.

⁷ Jatun mandacca ñanpi yacuta ubiashpami cutin fuerzata japinga.